Plöntur með ótrúlega sögu

Við ætlum að ganga um garðinn og segja sögur af plöntunum. Það er svo mikið af plöntum sem hafa alveg ótrúlegar sögur á bak við sig,“ segir Björk Þorleifsdóttir sem ásamt Hildi Örnu Gunnarsdóttur stendur fyrir göngu um Grasagarðinn í kvöld. Þar verður farið yfir sögur sem tengjast plöntum og þar er af nægu að taka að sögn Bjarkar.

„Til dæmis var því haldið fram hér áður að lyfjagras hefði stuðlað að ásökunum um galdra. Lyfjagras er náttúrulegur hleypir og var notað í ostagerð, þá hleypti það mjólkinni í kúnum í haganum og margur kúabóndinn fékk þá strax grun um að nágranninn væri að beita göldrum til að spilla fyrir,“ segir hún.

„Nánast allar plöntur hafa ótrúlega áhugaverða sögu. Ýviðurinn sem dæmi dregur nafn sitt af því að hafa verið notaður fyrir boga. Hann er svo sveigjanlegur. Á 15. öld var nánast kominn skortur á honum, það voru svo mörg stríð að það var verið að höggva hann massíft niður.“

Björk segir þær tengja plöntur við þjóðsögur. „Það er líka margt skemmtilegt í íslensku flórunni og ótrúlega margar þjóðsögur sem tengjast plöntum. Ég held að þetta verði mjög skemmtilegt og við stefnum á að hafa fleiri göngur í framtíðinni,“ segir Björk.

Ókeypis er í gönguna sem hefst við aðalinngang Grasagarðsins í Laugardal klukkan 20. Nánari upplýsingar um viðburðinn er að finna hér.