Innlent

Fundu ferðamann í tjaldi á fjórtándu holu

Bjarki Ármannsson skrifar
„Ég þóttist bara vera að taka mynd af stráknum sem var að slá en náði honum náttúrulega í leiðinni,“ segir Hjörtur.
„Ég þóttist bara vera að taka mynd af stráknum sem var að slá en náði honum náttúrulega í leiðinni,“ segir Hjörtur. Mynd/Hjörtur Brynjarsson
Kylfingar á Korpúlfsstaðavelli rákust á þriðjudagskvöld á erlendan ferðamann sem var að koma upp tjaldi á einum teignum. Svo virðist sem hann hafi gist þar um nóttina en sé nú farinn.

Hjörtur Brynjarsson, einn kylfinganna, deildi mynd af kappanum og tjaldinu á Facebook sem vakti athygli Víkurfrétta. Hjörtur segir í samtali við Vísi að félagarnir hafi verið á fjórtandu holu á teig þar sem kylfingar spila sjaldan, um þrjátíu metrum lengra en alla jafna er farið.

„Við förum þarna upp og þá er félaginn bara að föndra eitthvað með tjaldið sitt og græjur,“ segir Hjörtur. „Ég benti honum vinsamlega á að það væru til tjaldstæði. Ég vissi ekki hvort hann væri bara villtur eða hvað. En hann sagði að það hefði sprungið dekk á hjólinu hans og að hann hefði bara ákveðið að bíða eftir því að Bauhaus, sem er þarna við hliðina, myndi opna.“

Hjörtur og félagar tóku þessa útskýringu góða og gilda, enda ferðalangurinn ekkert að trufla þá í iðju þeirra. „Við vorum svosem ekkert að ræða við hann,“ segir hann. „Við bara slógum og héldum svo áfram en okkur þótti þetta frekar fyndið. Þannig við ákváðum að taka þessa mynd. Ég þóttist bara vera að taka mynd af stráknum sem var að slá en náði honum náttúrulega í leiðinni.“

Annar kylfingur frá Golfklúbbi Reykjavíkur heimsótti sama teig um nóttina og náði annarri mynd af tjaldinu, sem var þá komið upp. Ferðalangurinn seinheppni hefur sennilega sofið þar um nóttina.

„Þetta hefur nú gerst oft áður hjá okkur,“ segir Birkir Már Birgisson, vallarstjóri Korpúlfsstaðarvallar. „Þetta var líka í fyrra og hittifyrra.“

Birkir Már segist ekki hafa orðið var við það að þessi tiltekni ferðamaður hafi komið og farið. Svona mál hafi þó reglulega komið upp og það sé aldrei vesen að vísa fólki burt.  

„Öll skiptin sem við höfum rekist á þetta, þá hafa þetta verið útlendingar. Þeir hafa sjálfsagt bara heyrt að á Íslandi megi tjalda hvar sem er, ég veit það ekki.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.