Gullaldarlið Íslands keppir á HM skáksveita

Skáksamband Íslands sendir vaska sveit á HM skáksveita, 50 ára og eldri, sem hófst í Dresden í dag og stendur til 4. júlí. Sveitin er skipuð Gullaldarliði Íslands í skák: Jóhanni Hjartarsyni, Helga Ólafssyni, Margeiri Péturssyni, Jóni L. Árnasyni og Friðriki Ólafssyni. Meðaldur er 61 ár og liðsstjóri er Halldór Grétar Einarsson. Friðrik Ólafsson aldursforseti liðsins en nú er 64 ár síðan hann tefldi fyrst fyrir Íslands hönd, á Ólympíuskákmótinu 1952.

Þetta kemur fram í tilkynningu frá sérlegum blaðafulltrúa Gullaldarliðsins, Hrafni Jökulssyni, sem er harla ánægður með að tekist hafi að setja saman þetta stórskotalið.

„Um 60 skáksveitir eru skráðar til leiks og er íslenska sveitin sú stigahæsta á mótinu og stefnir vitaskuld að sigri. Keppnin verður hinsvegar án nokkurs vafa mjög skemmtileg og spennandi enda margir snjallir meistarar í öðrum liðum,“ segir Hrafn.

En, það er ef til vill rétt að rifja upp hvers konar kempur eru þarna á ferðinni, undir leiðsögn Hrafns:

Jóhann Hjartarson (2547 skákstig) leiðir sveitina, enda vann hann á dögunum glæsilegan sigur á Íslandsmótinu í skák, þar sem hann var aldursforseti keppenda. Jóhann varð fyrst Íslandsmeistari aðeins 17 ára gamall 1980 og hefur hampað titlinum sex sinnum.

Helgi Ólafsson (2543 stig) skipar 2. borð. Helgi, sem fæddur er 1956, varð þriðji stórmeistari Íslendinga 1984 og hefur sex sinnum hampað Íslandsmeistaratitlinum. Hann hefur auk þess þjálfað landslið okkar og verið skólastjóri Skákskóla Íslands um árabil.

Margeir Pétursson (2509 stig) fæddist 1960 og hefur tvisvar orðið Íslandsmeistari. Hann varð alþjóðlegur meistari 18 ára, og stórmeistari 26 ára. Margeir hefur, líkt og aðrir liðsmenn sveitarinnar, margoft keppt fyrir Íslands hönd.

Jón L. Árnason (2490 stig) vann hug og hjörtu Íslendinga þegar hann varð heimsmeistari unglinga árið 1977. Hann varð síðan stórmeistari í framhaldinu, eins og félagar hans í fjórmenningaklíkunni, og Íslandsmeistari í þrígang.

Goðsögnin Friðrik Ólafsson (2377) er aldursforseti íslenska liðsins . Hann fæddist 1935 og varð 81 árs í janúar. Hann varð Íslandsmeistari í fyrsta sinn árið 1952 og bar um árabil höfuð og herðar yfir aðra íslenska skákmenn, enda komst hann í fremstu röð í heiminum. Enginn Íslendingur hefur unnið jafnmargar skákir gegn þeim sem borið hafa heimsmeistaratitilinn. Friðrik var forseti FIDE, alþjóða skáksambandsins 1978-82, og nýtur mikillar virðingar í skákheiminum.

„Hið reynslumikla íslenska lið mætir á heimsmeistaramótið í Dresden með leikgleðina að leiðarljósi, en jafnframt er ljóst að íslenskir skákáhugamenn binda miklar vonir við góðan árangur Gullaldarliðsins okkar,“ segir hinn baráttuglaði Hrafn.