Frikki Weisshappel: Býður upp á frían bjór í Köben í kvöld

Friðrik Weisshappel er svo yfir sig ánægður með gengi íslenska karlalandsliðsins í fótbolta að hann ætlar að bjóða öllu Íslendingum í Kaupmannahöfn í drykk í kvöld. Hátíðin hefst klukkan 18:30 á staðartíma og fer fram á Laundromat Café sem staðsett er í Elmegade 15 í Norrebro.

Á sama tíma mun sjónvarpsþátturinn TV Avisen sem sýndur er á DR senda út beint frá staðnum en fjallað var um málið á vef DR í dag.

„Sál okkar er svolítið aum eftir erfiða tíma vegna Panamaskjalana, hrunið og lélegra stjórnmála. Allt saman hlutir sem við höfum skammast okkar fyrir. Þess vegna var frábært að fá eitthvað sem er svona hreint út í gegn, sem við höfum unnið fyrir og eigum skilið,“ segir Friðrik í viðtalinu.

Friðrik segist hafa unnið bunka af 20 króna seðlum (dönskum auðvitað) í því að hafa veðjað á 2-1 sigur Íslands í leiknum í gær. Peningana vill hann nota til þess að bjóða í gott partý. Það verður öllum þeim sem vilja fagna velgengni Íslands á EM í höfuðborg Danmerkur í kvöld.