Ingvi Hrafn skorinn á háls í dag

Ingvi Hrafn Jónsson, eigandi og helsta stjarna sjónvarsstöðvarinnar ÍNN, fer í aðgerð í dag. Samur við sig lætur fréttahaukurinn ekki það slá sig út af laginu og greinir frá gangi mála á Facebook samhliða því sem hann vekur athygli á þætti sínum Hrafnaþingi:

„Kominn á skurðdeild 5A,“ skrifar Ingvi Hrafn og lætur blikkandi broskall fylgja. „Allt að gerast. Ragnheiður Elín á Hrafnaþingi kvöldsins.“

Ingvi Hrafn lætur þennan krankleika ekki slá sig út af laginu og ber sig vel. Fyrr í mánuðinum greindi hann frá því að eftir miklar rannsóknir „innan besta heilbrigðiskerfis sem völ er á, hefur verið ákveðið að skera mig á háls nk. fimmtudag. Elín Laxdal æðaskurðlæknir par exellence mun hreinsa vinstri hálsslagæð, sem er hættulega þröng og orsakaði sennilega heilablóðfall á fimmtudag. Ber mig vel þótt ég sé skíthræddur,“ sagði Ingvi Hrafn.

Hann slær á létta strengi og staðfestir það við blaðamann Vísis að nú standi sem sagt til að skera hann á háls: „Jebbb.“

Vísir sendir Ingva Hrafni baráttu- og batakveðjur.