Vill njóta lífsins meðan þrek hans varir

Friðrik Guðmundsson dvelur á lungnadeild Landspítalans í Fossvogi gegn vilja sínum. Hann býr á sambýli í Reykjanesbæ ásamt bróður sínum og þriðja manni en hefur verið vistaður á spítalanum frá 27. mars.

Bræðurnir eru með sjaldgæfan erfðasjúkdóm, DMD, sem leggst á alla vöðva líkamans og ágerist með aldrinum.

Friðrik var fluttur á gjörgæslu Landspítalans eftir að hafa farið í hjartastopp á sambýlinu. Síðan hefur hann legið á lungnadeildinni vegna þess að á sambýlinu er aðeins einn starfsmaður á vakt yfir nótt.

„Starfsfólk sambýlisins treystir sér ekki til að taka við mér vegna manneklu. Það vantar eitt stöðugildi í viðbót,“ segir Friðrik, sem hefur barist síðustu vikur fyrir því að fá þá þjónustu sem hann þarf á sambýlinu.

Friðrik sendi erindi til Reykjanesbæjar. Í því lýsir hann þeirri ósk sinni að bætt sé við stöðugildi á sambýlinu svo hann komist heim. Hann fékk þau svör nýverið að bæjaryfirvöld ætluðu að afla sér upplýsinga í öðrum sveitarfélögum um hvernig þessum málum væri háttað. „Í svarinu kemur ekkert fram um framtíð mína,“ segir Friðrik. „Ég vil lifa lífinu áfram eins lengi og ég get. Hér get ég ekki gert það,“ segir hann en lofar þó starfsfólk á deild A6 sem leggi sig fram við að gera honum lífið þolanlegt.

Tveir þingmenn hafa reynt að leggja Friðriki lið. Birgitta Jónsdóttir, þingmaður Pírata, og Ásmundur Friðriksson, þingmaður Sjálfstæðisflokks. Fjallað var um baráttu Friðriks og afskipti þingmanna í DV. „Ég var að heyra frá Ásmundi og hann er að fara á fund í Reykjanesbæ á fimmtudaginn,“ segir Friðrik.

Fréttin birtist fyrst í Fréttablaðinu 1. júní