Ólafur Ragnar stefnir á bókaskrif um forsetatíð sína

Ólafur Ragnar Grímsson forseti Íslands segist ætla að einbeita sér að bókarskrifum eftir að forsetatíð hans lýkur. Um er að ræða endurminningar hans þar sem hann mun fjalla um hin ýmsu mál sem komu upp á 20 ára forsetatíð hans. Þetta kom fram í þættinum Heill forseta vorum: Þjóðin á Bessastöðum sem sýndur var á RÚV í kvöld.

Í viðtalinu var hann meðal annars spurður hvort hann hefði hlaupið á sig með því að boða til blaðamannafundar eftir fund hans og Sigmundar Davíð Gunnlaugssonar þáverandi forsætisráðherra í apríl. Þeirri spurningu svaraði hann neitandi.

„Ég hef nægan tíma til þess á næstu árum að fara í einstök atvik með greinum og bókum sem ég mun auðvitað gera. Ég tel að ég hafi ekki verið of fljótur á mér.“

Breytingar á forsetaembættinu síðustu ár

Ólafur sagði breytingar hafa orðið á stöðu forsetaembættisins á síðustu árum og áratug. Í því samhengi nefndi hann aukinn þrýsting erlendis frá í því að heimsækja og taka á móti þjóðarleiðtogum til Íslands. Önnur breyting sagði hann vera að fólk hafi stofnað ýmis konar samtök sem vilji nú samskipti við forsetann.

Þriðja atriðið sem hann nefndi sem hafi breytt embættinu er upplýsingatækni- og fjölmiðlabylting síðustu ára.

„Allir forsetar sem voru á undan mér bjuggu við umhverfi að það var nánast aldrei greint frá því sem þeir sögðu, ef þeir sögðu eitthvað á málfundum. Nú er þess krafist að forsetinn hafi heimasíðu, hann geri grein fyrir því hvað hann gerir – nánast á hverjum degi. Allt sem hann segir er hægt að taka upp og senda út um allan heim.“