Fótbolti

Besti leikur liðsins undir minni stjórn

Henry Birgir Gunnarsson skrifar
„Ég get ekki neitað því að vera afar sáttur. Ég held að við getum sagt að þetta hafi verið besti leikur liðsins undir minni stjórn. Fyrirfram hefði ég verið sáttur við eins marks sigur í hörkuleik,“ segir Freyr Alexandersson landsliðsþjálfari glaðbeittur eftir sigurinn glæsilega á Skotum í gær.

Þarna mættust bestu lið riðilsins og þau voru bæði ósigruð. Eftir þennan leik er aðeins Ísland ósigrað og ekki heldur búið að fá á sig mark.

Stelpunum dugar sigur gegn Makedóníu á þriðjudag til að gulltryggja EM-sætið. Makedónía er stigalaust í riðlinum og Ísland vann leikinn gegn þeim ytra, 0-4. Ef stelpurnar spila sinn eðlilega leik ætti farseðillinn á EM að vera klár.

Frábærar sjö mínútur

Þrátt fyrir mikla yfirburði nær allan leikinn í gær var Ísland aðeins með eins marks forskot í hálfleik. Markið skoraði Hallbera Guðný Gísladóttir beint úr aukaspyrnu. Svekkjandi miðað við hversu vel liðið var að spila. Skipulagið frábært og stelpurnar sterkari og grimmari í öllum aðgerðum.

Það var aftur á móti frábær sjö mínútna kafli eftir rúmlega klukkutíma leik sem gerði út um leikinn. Þá skoraði íslenska liðið þrjú góð skallamörk. Harpa Þorsteinsdóttir, Gunnhildur Yrsa Jónsdóttir og Margrét Lára Viðarsdóttir með skallamörkin góðu.

Skotar fengu tækifæri til þess að komast á blað í uppbótartíma en vítaspyrna Kim Little fór í stöngina. Íslenska liðið er því ekki enn búið á að fá á sig mark í riðlinum eins og áður segir.

Þeirra stjörnur sáust ekki

„Liðið var mjög vel undirbúið og skilaði toppframmistöðu. Ég upplifði að við værum klassa betri. Að við værum algjörlega með þær. Þeirra stjörnur sáust ekki í leiknum. Undirbúningurinn snérist mikið um að þora að halda boltanum og spila í stað þess að lúðra fram og vona það besta. Það þarf hugrekki til þess að halda í boltann og spila milli lína. Við tímasettum þetta allt mjög vel,“ segir Freyr og það leynir sér ekki hvað hann er stoltur af sínu liði.

„Við vorum að hápressa á útivelli gegn mjög góðu liði. Það eru ekkert margir sem þora því og mér fannst við gera það virkilega vel.“

Hvað ef það kemur drullumark?

Freyr viðurkennir að hafa ekki liðið allt of vel með 1-0 forskotið þó svo yfirburðirnir hafi verið miklir.

„Ég hugsaði hvað ef það kemur eitthvert drullumark? Hvað myndi þá gerast í leiknum? Liðið hélt aftur á móti dampi og það sýnir ákveðin karaktereinkenni. Að vera ekkert að slaka á. Við komum í síðari hálfleikinn af fullum krafti og ætluðum að ná í annað markið,“ segir landsliðsþjálfarinn sem er mjög stoltur af því að liðið sé ekki enn búið að fá á sig mark í riðlakeppninni.

„Fyrir mig er það æðislegt. Maður elskar það að fá ekki á sig mark og vonandi höldum við áfram að halda hreinu. Stöngin kom sterk inn til aðstoðar í kvöld. Ási aðstoðarþjálfari sagði fyrir vítið að skotið myndi enda í stönginni. Hann er alveg með þetta, kallinn.“

Makedónía er með lélegt lið

Landsliðsþjálfarinn fer ekkert í grafgötur með að hans lið sé komið með einn og hálfan fót á EM. Hann gerir þá kröfu að stelpurnar klári dæmið gegn Makedóníu á þriðjudag.

„Við ætlum að klára þetta á þriðjudag svo fólk geti farið að panta sér hótel og svona. Þær eru lélegar. Því er ekki hægt að neita og ég vil að við klárum það verkefni með sóma. Það er ekki okkur að kenna að þær séu ekki betur settar en þetta í fótbolta. Við munum ekki sýna neina miskunn. Munum spila af krafti og klára þetta með toppframmistöðu. Það kemur ekkert annað til greina.“


Tengdar fréttir




Fleiri fréttir

Sjá meira


×