Grunaði ekki að saga Góðu systur væri svona áhugaverð

„Þetta hefur verið algjörlega frábært, þetta gekk svo rosalega vel og lífsreynslan svakaleg,“ segir Þórunn Antonía, söngkona og upphafskona Góðu systur, sem er nýsnúin aftur heim frá Bandaríkjunum. Fór Þórunn út til Kaliforníu í boði ekki smærra fyrirtækis en sjálfs Face­book til að halda þar erindi vegna hópsins Góðu systur. Telur hópurinn rúmar fimmtíu þúsund konur, sem telst býsna merkilegt í ljósi þess að Íslendingar eru um þrjúhundruð og þrjátíu þúsund.  

„Ég talaði á þessari ráðstefnu á vegum Facebook, Mom 2.0, ásamt tveimur konum, sem hafa einnig stofnað áhugaverða hópa. Önnur er blind og fann sig knúna til að stofna hóp er hún varð ófrísk og þurfti að standa gegn miklum fordómum. Hin er indversk kona sem flutti til Bandaríkjanna og stofnaði sinn hóp til að ræða ólíka menningarhópa. Báðar með það að markmiði að minnka fordóma.“

Þórunn segist býsna upp með sér yfir að hafa verið fengin til að slást í hópinn með þessum kraftmiklu konum, og segist hafa fengið virkilega góð viðbrögð. „Þeim fannst þetta stórmerkilegt, að fimmtíu þúsund konur hefðu safnast í hópinn á þremur sólarhringum. Mig grunaði ekki hversu áhugaverð þessi saga væri, enda situr maður kannski ekki heima hjá sér og „ómægod-ar“ yfir sjálfri sér endalaust,“ segir hún og skellir upp úr. Viðurkennir Þórunn þó fúslega að hún hafi ekki verið sú eina sem stútfylltist innblæstri og aðdáun, því sannarlega hafi henni tekist að ná til áheyrenda.

„Það var svolítið skondið að fá metsölurithöfundinn Jessicu Lahey hlaupandi á eftir sér, til að segja mér hversu innblásin hún og sessunautur hennar, ritstjóri The New York Times, hefðu verið. Hún fór þá að segja mér að verið væri að endurskoða kommentakerfi The New York Times og þar hefðu þær hitt á sömu hugmynd og ég, að henda einfaldlega út öllu neikvæðu. Það var svolítið gaman að heyra að þær væru sama sinnis. Það segir mér líka svolítið að konur um allan heim séu komnar með leið á þessu. Ég meina, það má alveg finnast eitthvað fáránlegt án þess að setjast við lyklaborðið og setja þá skoðun á internetið.“

Eftir að ráðstefnunni lauk staldraði Þórunn aðeins við þar vestra og skaust til Los Angeles. „Ég hef haft það nokkuð fínt hérna, hitt gamla vini og fólk sem ég hef unnið með. Svo hef ég svolítið verið í myndatökum, dálítið óvænt,“ segir hún alsæl. 

„Ég er alltaf svolítið í því að lenda í ævintýrum, og er mjög opin fyrir þeim. Ég kynntist til að mynda ljósmyndara, fyrrverandi ólympíu­fara í hokkí sem er á sama leveli og ég í þessum efnum, nema að hagsmunir kvenna á sviði íþrótta brenna á henni. Ég skellti mér bara í myndatöku, glamúr sexí pæjan er alveg hlutverk sem ég skelli mér stundum í þó ég sé núna kannski meira á hippalínunni. Það er nefnilega líka allt í lagi að vera svolítið sexí og maður á ekkert að skammast sín fyrir það. Konur verða ekki minni femínistar fyrir það,“ segir þessi ævintýragjarna kjarnakona og bætir svo við að stefnan sé sett á að vinna meira með henni í náinni framtíð, en lítið megi gefa upp núna. 

„Nú ætla ég bara að fara af stað með nýtt námskeið í Kramhúsinu þar sem ég ætla að nýta ballettmenntunina mína í bland við jóga. Námskeiðið er fyrir konur sem langar til að gleðjast og á ekkert skylt við megrun,“ segir Þórunn. Hana langar jafnframt mikið að halda áfram að dreifa út jákvæða boðskapinn og horfir til ungra stúlkna. „Mig langar að búa til erindi og fara inn í skólana, því það verður að byrja snemma á þessu. Ég held það sé alveg ljóst að Góða systir verði eitthvað stærra og meira," segir hún glaðleg í lokin.