Graf­alvar­legt á­stand í kirkju­görðum landsins

Ný skýrsla nefndar innanríkisráðherra um fjármál kirkjugarða hér á landi lýsir alvarlegum fjárskorti. Formaður Kirkjugarðasambands Íslands segir að annað hvort þurfi að auka fjárframlög til garðanna eða hreinlega breyta lögum um þá.

Fjallað er um niðurstöður nýju skýrslunnar í Bautasteini, fréttabréfi Kirkjugarðasambandsins. Þar segir að framlag ríkisins til kirkjugarða landins hafi síðastliðin sjö ár verið skert með þeim afleiðingum að kirkjugarðar hafi ekki lengur rekstrarfé til að greiða fyrir grafartöku.

„Það er nú þannig að kirkjugarðar landsins, sem eru litlir og meðalstórir garðar, þeir eru í miklum vanda vegna þess að þegar taka þarf grafir í þessum görðum standa þeir frammi fyrir því að það þurfi að taka af svokölluðum umhirðupeningum til þess að greiða verktökum fyrir grafartöku,“ segir Þórsteinn Ragnarsson, formaður stjórnar Kirkjugarðasambands Íslands. „Þó að því sé reyndar þannig farið víðast hvar að verktakar eru að leggja fram reikninga á mun lægri taxta en almennt er.“

Kirkjugarðar Reykjavíkurprófastsdæma, sem þjóna rúmum helmingi þjóðarinnar, hafa að því er fram kemur í skýrslunni verið reknir með halla fjögur af síðastliðnum fimm árum. Þórsteinn segir ljóst að ekki sé lengur hægt að halda áfram rekstri garðanna við þessar aðstæður.

„Við erum hálfgerð hornreka á borði þeirra sem um þessi mál fjalla í ráðuneytunum,“ segir hann. „Þeir verða að koma að borðinu ásamt okkur og við þurfum að semja um nýtt samkomulag til þess að þetta gangi upp. Öðrum kosti þarf Alþingi að breyta lögum og fækka þeim verkefnum sem kirkjugörðunum er falið að sinna.“