Uppbygging Franska spítalans kostar yfir 1,2 milljarða króna

Kostnaður við uppbyggingu franska spítalans á Fáskrúðsfirði hefur farið langt fram úr upphaflegri áætlun og verkefnið stækkað á framkvæmdatímanum. Uppbygging franska spítalans var áætluð um 250 milljónir króna árið 2010 og helmingur kostnaðarins kæmi frá Frakklandi. Nú er ljóst að kostnaður mun losa 1,2 milljarða króna og frönsk yfirvöld hafa ekki sett krónu í verkefnið.

Minjavernd ber ábyrgð á framkvæmdinni og stýrir henni og hefur fengið fjölda verktaka til vinnu á Fáskrúðsfirði. Þorsteinn Bergsson, framkvæmdastjóri Minjaverndar, segir það hafa verið nokkra bjartstýni að helmingur kostnaðarins yrði greiddur af frönskum stjórnvöldum. „Það er nú aðeins svo að góðviljaður útgerðarmaður frá Frakklandi veitti okkur eitt þúsund evrur til uppbyggingarinnar, það er allt og sumt. Hitt höfum við þurft að greiða sjálf. Það hefur verið svolítið bjartsýnt á sínum tíma að telja svo mikið fé koma erlendis frá,“ segir Þorsteinn.

Í viðtalið við Fréttablaðið þann 27. febrúar 2010 segir Þorsteinn mikinn áhuga frakka vera á verkinu og gengið sé út frá því að fá fjármagn þaðan. „Við sjáum áhuga í Frakklandi á að veita fjárstuðning til verksins sem gæti numið allt að helmingi af kostnaði. Gangi það eftir mun Minjavernd standa undir því sem út af stendur.“

Árið 2010 var heildarkostnaður áætlaður um 245 milljónir og átti um 120 milljónir að verða greiddar af Minjavernd. Nú, sex árum síðar hefur kostnaðurinn fjórfaldast. „Þegar allt verður talið um verkefnið losa 1.2 milljarða króna,“ segir Þorstein „Þá var hinsvegar aðeins horft til gamla spítalans. Nú hefur verkefnið hinsvegar stækkað mikið og mörg hús verið gerð upp og því hefur kostnaðurinn vaxið sem því nemur.“

Minjavernd er í eigu ríkisins og Reykjavíkurborgar sem eiga 38.7 prósent hlut hver, og sjálfseignarstofnunarinnar Minja. Hildur Sverrisdóttir, borgarfulltrúi Sjálfstæðisflokksins, segir eðlilegt að málefni Minjaverndar séu rædd oftar á vettvangi borgarinnar. „Félaginu er ekki ætlað að vera á framfæri hins opinbera, hvorki ríki né borg þó þau eigi hlut í því, og á nýjustu ársreikningum þá má sjá að eiginfjárstaða félagsins er sterk. Þar sem félagið byggir á svo gömlum grunni er eflaust að finna ástæðu þess að félagið er í eigu hins opinbera en það væri eðlilegt að skoða að það yrði gert alveg sjálfstætt. Ef það er vilji til að borgin eigi í þessu félagi væri þó eðlilegt að það væri rætt oftar á vettvangi borgarinnar hvað þar fer fram,“ segir Hildur. 

Fréttin birtist fyrst í Fréttablaðinu 23. apríl