Kátir karlar 20 ára

Kórsöngur er talinn heilsusamlegur. Í grein í South China Morning Post frá því í desember 2014 kemur fram að kórsöngur er af hinu góða bæði tilfinningalega, líkamlega og félagslega og fullyrt er að heilsusamleg áhrif séu vísindalega rökstudd.

Söngurinn er sagður góður fyrir lungu, hjarta og blóðflæði, bætir svefn, þjálfar andlitsvöðva, bætir hvernig á að bera sig, opnar öndunarfæri, framleiðir endorfine, bætir ónæmiskerfið, dregur úr reiði og áhyggjum, bætir sjálfsímynd, minnkar streitu og hvetur til tengsla við aðra. Í annarri grein er talið að kórsöngur auki ekki aðeins súrefnismagnið í blóðinu heldur leysir úr læðingi „hamingju“ hormóna eins og oxytocin sem talið er að minnki streitu og lækki blóðþrýsting. Kórsöngur er vinsæll á Íslandi. Áætlað hefur verið að minnst 3.000 manns taki þátt í kórastarfi.

Karlakórinn Kátir karlar var stofnaður 1996 hefur því starfað í 20 ár á þessu ári. Í kórnum eru nú 37 félagar. Margir kórfélagar eru með langa reynslu  af kórsöng, hafa sungið í kórum í tugi ára og syngja enn  eins og í Karlakórnum Fóstbræðrum, Karlakór Reykjavíkur, Óperukórnum í Reykjavík og kirkjukórum. Aðrir félagar hófu kórsöng þegar eftirlaunaaldri var náð. Kórinn hefur nokkra sérstöðu en að því sem félagar vita best hefur KKK hæstan meðalaldur kóra á Íslandi eða  77 ár.

Elsti starfandi félaginn er 92 ára og sá yngsti að verða 70 ára.  Svo eru 9 félagar á aldrinum 80 og 90 ára, 25 félagar eru 60 og 70 ára og 2 félagar innan við 70 ára. Kórinn æfir vikulega yfir veturinn og kemur fram og syngur fyrir aldraða á hjúkrunarstofnunum einkum fyrir jólin.

Sá elsti 92 ára

Elsti félagi kórsins Sveinn Pálsson er 92 ára. Sveinn er fæddur og uppalinn í Sandgerði og hefur sungið í kórum í 72 ár síðan hann hóf tvítugur söng í Hvalsneskirkjukórnum. Sveinn  syngur nú í 4 kórum.  Hann söng með Keflavíkurkvartettinum á sínum tíma. Söngur með kórum einkum Karlakórnum  Fóstbræðrum hefur verið stór þáttur í lífi Sveins. Hann söng m.a. með 14 Fóstbræðrum inn á tvær plötur. Sveinn spilaði fyrrum á harmóníku á dansleikjum í Sandgerði og þar kynntist hann eiginkonu sinni Ingibjörgu Marteinsdóttur á einu ballinu. Þau hafa verið gift í 65 ár, eiga 5 börn og 32 afkomendur.

KKK kórinn í félagi við blandaðan kór Félags eldri borgara í Reykjavík heldur vortónleika í Grensáskirkju föstudaginn 29. apríl kl. 17 undir yfirskriftinni Söngurinn yngir og kætir. Söngstjóri beggja kóranna er Gylfi Gunnarsson og meðleikari á píanó er Hrönn Þráinsdóttir.