Svörin komu seint en nú liggja reglur fyrir

Fulltrúar skóla- og frístundasviðs Reykjavíkurborgar ætla að funda með leikskólastjórum í dag vegna fjárhagsstöðu skólanna. Þungt hljóð er í leikskólastjórum vegna hagræðingarkröfu af hálfu borgarinnar í rekstri leikskólanna.

Í frétt Stöðvar 2 á þriðjudag kom fram að nýjar reglur gera ráð fyrir að halli á rekstri leikskólanna færist milli ára. Þetta eykur á vandann vegna hagræðingarkröfunnar. Jónína Lárusdóttir, leikskólastjóri á Klömbrum, sagði sinn rekstur hafa verið tæpar tvær milljónir í mínus í byrjun árs. Svo sé gert ráð fyrir að hún spari um milljón til viðbótar á þessu ári.

Helgi Grímsson, sviðsstjóri skóla- og frístundasviðs Reykjavíkurborgar, segir það hafa skapað vanda að borgar­yfirvöld hafi ekki gefið nein svör varðandi útfærslur á hagræðingu í leikskólarekstrinum. „Þegar menn hafa þröngan fjárhag og við erum í því að herða beltið um eitt gat enn, þá er eðlilegt að menn ói við því. Sérstaklega þegar ekki lá skýrt fyrir hvaða leikreglur lágu fyrir varðandi afgang á halla frá áramótum,“ segir Helgi.

Helgi segir að leikskólastjórar hafi haft miklar áhyggjur af því að hlutir sem þeir réðu ekki við, eins og fjöldi barna á leikskóla með þroska­frávik og kostnaður sem fellur til vegna langtímaveikinda starfsmanna, myndu falla á leikskólana. Fyrrgreindir þættir hafi nú verið skilgreindir sem óhagstæð ytri skilyrði og hver leikskóli eigi ekki að bera ábyrgð á slíku. Hið sama eigi við um verðlagsþróun. „Þetta eru leikreglur sem var verið að skerpa á og ákveða hvað ætti við. Við fengum bara svör of seint og það er það sem gerist þegar menn eru stressaðir og fá ekki svör að þeir ýfast upp.“ 

Helgi býst við að það verði hægt að draga úr áhyggjum leikskólakennara á fundinum í dag. „Já, að einhverju leyti. Það er hins vegar vitað að það er hagræðing.“ Skóla- og frístundasvið hafi því lagt áherslu á að þegar fjárveitingar til einstakra liða væru lækkaðar þá væri hægt að mæta því með mótvægiskostnaði.

Fréttin birtist fyrst í Fréttablaðinu 1. apríl.