Foreldrar ósáttir við lokun kristilegs hverfisleikskóla á Akureyri

Foreldrar barna á leikskólanum Hlíðabóli á Akureyri eru ósáttir við þá ákvörðun bæjaryfirvalda að loka leikskólanum sumarið 2017. Vilja þeir halda í hverfisleikskólann sinn. Leikskólinn er rekinn af Hvítasunnusöfnuðinum á Akureyri.

Foreldrar efndu til fundar með yfirmönnum skóladeildar í kirkju Hvítasunnusafnaðarins, sem er í sömu byggingu og leikskólinn, síðastliðinn fimmtudag og var nokkur hiti í fólki. Skorað var á bæjaryfirvöld að endurskoða ákvörðun sína um að loka eina leikskólanum í bænum sem lætur börnin fara með bænir og er með kristilegt starf innan skólans. Nefndi eitt foreldri á fundinum að nú væri verið að taka af þeim eina kristilega skólann og senda börnin í aðra skóla þar sem væri kennt jóga sem væri hindúismi og andstætt kristinni trú.

„Leikskólinn er okkur mjög kær og erum við ánægð með þær áherslur sem eru áberandi á Hlíðabóli, svo sem tjáningu, skapandi starf ásamt kærleika og umburðarlyndi fyrir náunganum,“ segir í bréfi foreldra til Akureyrarkaupstaðar vegna lokunarinnar.

Alls eru 47 börn í leikskólanum og samkvæmt Akureyrarkaupstað myndu sparast um 70 milljónir króna við að loka þessum leikskóla. Nú gæfist mikilvægur tími til að finna þeim börnum sem væru á Hlíðabóli stað á öðrum leikskólum.

Á vef Hlíðabóls segir að kristilegt starf sé rauður þráður í starfi leikskólans. „Við þökkum Guði fyrir matinn, áður en við borðum, og biðjum hann um að varðveita og blessa foreldra okkar og aðra ástvini. Við syngjum sunnudagaskólasöngva í bland við aðra söngva og skoðum sögur úr Biblíunni ásamt öðrum sögum sem okkur finnst skemmtilegar. Einu sinni í viku förum við inn í kirkju þar sem við syngjum saman, heyrum um Jesú og aðrar trúarhetjur,“ segir í fræðslu um skólann.

Hvítasunnukirkjan hefur rekið leikskóla síðan 1988. Safnaðarhirðir kirkjunnar er Snorri Óskarsson, sem var sagt upp með ólögmætum hætti hjá Akureyrarbæ 2012.

Fréttin birtist fyrst í Fréttablaðinu 7. apríl.