Tilfinningalegt ofbeldi að hindra umgengni föður og barns

Stöð2 greindi frá því á dögunum að feður séu þolendur í um 85% svo kallaðra tálmunarmála. Guðmundur Steingrímsson, þingmaður Bjartrar framtíðar, sagðist þá vilja sjá slík mál skilgreind sem ofbeldi í endurskoðuðum barnalögum og undir það tók í kjölfarið þingmaður Sjálfstæðisflokks, Brynjar Níelsson.

Bragi Guðbrandsson, forstjóri Barnaverndarstofu, segir að til séu málefnalegar ástæður fyrir tímabundinni tálmun, en í fæstum tilvikum sé um það að ræða. „Oft er þetta hreint valdatafl sem bitnar á börnunum og það getum við að sjálfsögðu ekki látið líðast. Þá er stutt í að það verði að líta á þetta sem ofbeldi, tilfinningalegt ofbeldi, gagnvart börnum sem þau geta borið mjög mikinn skaða af.“ 

„En ég vil ítreka að það gildir ekki um öll mál. Þetta er mjög flókin flóra mála sem spannar heilt litróf svo það er erfitt að setja það allt undir sama hatt, þó því sé ekki að leyna að þessi staða veldur verulegum áhyggjum eins og hún er núna.“

Afleitt þegar mál dragast á langinn

Barnaverndarkerfið hefur almennt ekki aðkomu að umgengnismálum þótt dæmi séu um að barnavernd grípi inn í erfiðustu málin. Sýslumannsembættin hafa það hlutverk að leiða slík mál til lykta og er reynt til hins ítrasta að gera það með sáttameðferð. Komi til tálmunar eru úrræðin hinsvegar af skornum skammti. Dagsektum er sjaldan beitt og þess eru dæmi að mæður meini börnum að umgangast föður sinn árum saman.

„Þess vegna held ég að okkar regluverk þurfi að vera með þeim hætti að unnt sé að grípa inn í slík mál með skjótvirkum hætti. Og það höfum við því miður ekki,“ segir Bragi.

„Þrátt fyrir góðar úrbætur á lögum síðustu ár þá þarf að stíga stærri skref í þá veru að hraða verulega allri málsmeðferð í þessum málum, því það er afleitt þegar þessi mál dragast á langinn eins og dæmi eru um.“