Heimilislausum háskólanema synjað af Félagsstofnun Stúdenta

Rós Kristjánsdóttir, ein þeirra þriggja sem missti aleiguna í brunanum á Grettisgötu 87 fyrir tveimur vikum, deildi í dag á Facebook-síðu sinni synjunarbréfi sem hún fékk frá úrskurðarnefnd Félagsstofnunar Stúdenta en hún hafði beðið um að komast á forgang á biðlista um að fá íbúð í Stúdentagörðum þar sem hún væri heimilislaus.

Í færslu sinni sagðist hún hafa skrifað hjartnæmt bréf þar sem hún útskýrði stöðu sína en svarið var staðlað og hnitmiðað, blákalt nei. Þar kom einungis fram að mál hennar hafi verið tekið fyrir en að ákveðið hafi verið að synja beiðni hennar um forgang.

„Maður er voðalega viðkvæmur fyrir öllum vondum fréttum núna og þetta var blaut tuska í andlitið,“ segir Rós, háskólanemi og fyrirsæta, sem hefur síðustu tvær vikur fengið húsaskjól á sjö mismunandi stöðum en þó alltaf tímabundið. „Ég er ekkert að búast við því að ég fái allt upp í hendurnar eða að þau reddi okkur bara strax en ég var nú samt að vonast til að fá að vera á einhverjum lista. Ég var svona í það minnsta að vonast eftir því að það væri eitthvað sagt við mann annað en bara það að umsókninni væri hafnað“.

Rós segir það að hafa misst aleiguna svo sannarlega setja strik í reikninginn hvað námið varðar. Rós stefnir á að klára BA-gráðu sína í mannfræði og útskrifast núna í vor.

„Ég sagði þeim að ég hafi verið íbúi á Grettisgötu sem að brann og að ég væri nú heimilislaus nemandi Háskóla Íslands og að ég ætlaði mér að halda áfram í mastersnám. Ég spurði hvort ég gæti fengið einhverja undanþágu og þetta var svarið sem barst“.

Dagurinn var svo sannarlega átakanlegur fyrir Rós því í morgun frétti hún eins og aðrir af hryðjuverkaárásunum í Brussel. Þær fréttir tóku örlítið meira á hana en aðra því þar býr móðir hennar. Hún fékk þó snemma fregnir af því að móðir hennar væri óhult.

Grátlegt að synja fólki

Það er Félagsstofnun Stúdenta sem sér um að úthluta nemendum húsnæði á Stúdentagörðum en leynilegt er hverjir sitja í úrskurðarnefnd. Þar eru þrír einstaklingar; einn frá Háskóla Íslands, einn frá Stúdentaráði og einn frá Félagsstofnun stúdenta. Nefndin tekur fyrir allar forgangs- og undanþágu beiðnir og metur eftir fyrirsettum reglum.

Rebekka Sigurðardóttir, upplýsingafulltrúi Félagsstofnunnar Stúdenta, vildi ekki tjá sig um þetta einstaka mál. „Eins og þetta gengur fyrir sig þá getur fólk sótt um forgang og það gera margir. Það eru fleiri hundruð beiðnir sem eru teknar fyrir af úrskurðarnefnd á hverju einasta ári. Fæstir leika sér að því að sækja um forgang og staða þeirra flestra er mjög grátleg“.

Félagsstofnunin hefur um 1100 leigueiningar til úthlutunar á hverju ári. Eftir hverja úthlutun eru um 1000 manns sem sitja eftir á biðlista. Það er því um helmingur sem fær synjun.

„Auðvitað er maður stundum gráti næst yfir því að þurfa að segja nei við fólk. Þess vegna erum við að berjast fyrir því að byggja meira. Við viljum auðvitað hafa það þannig að allir sem sæki um á Stúdentagörðum komist að“.