Bankaránið í Borgartúni: Úrskurðaður í gæsluvarðhald á meðan málið er til meðferðar Hæstaréttar

Hæstiréttur staðfesti í dag gæsluvarðhaldsúrskurð yfir Ólafi Ingi Gunnarssyni sem handtekinn var og dæmdur fyrir að ræna Landsbankann í Borgartúni í lok síðasta árs. Honum er gert að sæta gæsluvarðhaldi á meðan mál hans er til meðferða fyrir Hæstarétti, en Héraðsdómur Reykjavíkur dæmdi hann og Jóel Maron Hannesson í þriggja ára fangelsi í síðasta mánuði eftir að þeir höfðu játað brotið.

Báðir voru með andlitið hulið og klæddir hettupeysu, Ólafur Ingi með eftirlíkingu af skammbyssu og Jóel Maron með hníf. Ógnaði Ólafur gjaldkera með byssunni og tók peninga úr sjóðsvél sem gjaldkerinn neyddist til að opna.

Þeir höfðu á brott með sér 558 þúsund krónur, rúmlega þúsund evrur, tíu þúsund japönsk jen, 500 danskar krónur og tuttugu pund.

Til undirbúnings ráninu höfðu þeir tekið sendibifreið ófrjálsri hendi og komu á henni að bankanum. Þeir skildu bifreiðina eftir í gangi og óku á brott eftir ránið. Þeir földu síðar ránsfenginn og reyndu á annan hátt að dylja slóð sína.

Lögreglan hóf þegar umfangsmikla eftirgrennslan og var myndum af ræningjunum dreift. Ábendingar bárust um að ákærðu kynnu að hafa verið að verki. Þeir gáfu sig svo fram við lögreglu að tilstuðlan aðstandenda sinna um miðnætti sama dag og ránið var framið. Þá vísuðu þeir á ránsfenginn sem komst til skila.