Rússneskir vopnaframleiðendur græða á tá og fingri

Opinber markmið yfirvalda í Rússlandi með þáttöku rússneska hersins í átökunum í Sýrlandi voru þau að berjast gegn hryðjuverkum og styðja við bakið á stjórn Bashar-al Assad Sýrlandsforseta. Hliðarafurð þáttökunnar er þó sú að rússneskir vopnaframleiðendur græða á tá og fingri.

Vladimir Pútin Rússlandsforseti heimsótti í dag nýja ríkisrekna vopnaverksmiðju og talaði þar fjálglega um hversu mikið rússneskir vopnaframleiðendur hefðu grætt á átökunum í Sýrlandi. Sagði hann að útflutningur rússneskra vopna hafi verið virði 14,5 milljarða bandaríkjadollara, mun betra en búist var við. Þá sagði hann að tekið hefði verið á móti pöntunum frá erlendum aðilum fyrir 56 milljarða dollara.

Rússar hófu þáttöku sína í átökunum í Sýrlandi 30. september á síðasta ári en hafa dregið herlið sitt til baka eftir um fimm mánuði. Sagði Pútín að markmiðum með þáttöku rússneska hersins í átökunum í Sýrlandi hefði verið náð.

 

Kína, Víetnam og Pakistan helstu viðskiptavinir

Sérfræðingar telja að talan sem Pútín nefndi varðandi útflutning rússneskra vopna sé öllu lægri eða 7.6 milljarðar. Þrátt fyrir það er ljóst að rússneska ríkið hagnast mikið á vopnaframleiðslu. Fyrirtækin sem framleiða vopn eru oftar en ekki í ríkiseigu og er talið að kostnaður ríkisins vegna þeirra nemi um 500-900 milljónum dollara.

Alsír, Kína, Egyptaland, Íran, Víetnam og Pakistan eru helstu kaupendur vopna frá Rússlandi og stefnt er að því að komast betur inn á markaði í Afríku, S-Ameríku og Mið-austurlöndum. Rússneskar herþotur á borð við Su-35 og Su-32 eru vinsæl auk hinna glænýju Mi-28n þyrlna sem notaðar voru með góðum árangri í Sýrlandi.

Frá því að Pútin sneri aftur í forsetaembætti árið 2011 hefur hann lofað að auka útflutning á rússneskum vopnum og að koma Rússlandi aftur á hæsta stall sem vopnaframleiðandi í heiminu. Svo virðist sem að það sé að takast en viðskipti Rússa með rússnesk vopn hafa aukist um 28 prósent samkvæmt tölum frá SIPRI, Alþjóðlegu friðarrannsóknarstofnunni í Stokkhólmi.