Pútin skipar hernum að yfirgefa Sýrland

Vladimir Putin, forseti Rússlands, skipaði yfirmönnum hersins að flytja mest allan herafla þeirra í Sýrlandi aftur heim. Hann sagði Rússa hafa náð markmiðum sínum með hernaðaríhlutuninni. Putin sagðist vona til þess að brottflutningur herafla Rússa frá Sýrlandi myndi hjálpa til við friðarviðræður.

Flutningarnir eiga að hefjast á morgun. Forsetinn sagði þó að Rússar ættu að taka meiri þátt í friðarviðræðunum. Þær hófust að nýju í Genf í dag.

Samkvæmt Reuters hefur Putin sagt Bashar al-Assad, forseta Sýrlands, frá ákvörðun sinni. Ekki liggur fyrir hve stóran hluta herafla Rússa eigi að flytja aftur heim, né hvenær flutningunum eigi að ljúka. Rússar munu enn vera mið viðveru í flugstöð sinni í Latakiahéraði og í flotastöð sinni í Tartous.

Þá segir á vef rússnesku fréttaveitunnar TASS, sem rekin er af ríkinu, að samkvæmt Putin hafi her Rússlands hafi sýnt fagmennsku og að hermenn hafi unnið vel saman.