Telur ákvæði um endurupptökunefnd hreinan bastarð

„Ljóst [er] að tilraunabúskapurinn með endurupptökunefnd hefur algerlega farið út um þúfur,“ ritar Ragnar H. Hall, hæstaréttarlögmaður, í aðsendri grein í Fréttablaðinu í dag.

Árið 2013 var ákvæðum um endurupptökunefnd bætt inn í lög um dómstóla. Hlutverk hennar er að taka ákvarðanir um hvort mál, sem fengist hefur endanleg niðurstaða í fyrir dómstólum, skuli tekin fyrir á nýjan leik. Fallist nefndin á slíka beiðni er eldri dómur úr gildi fallinn.

Þann 25. febrúar síðastliðinn felldi Hæstiréttur dóm í máli þar sem nefndin hafði fallist á endurupptöku. Í dómnum kom meðal annars fram að með fyrrgreindum lögum hefði löggjafinn falið stjórnsýslunefnd hlutverk sem gæti náð til þess að fella úr gildi úrlausnir dómstóla. Slíkt bryti gegn þrígreiningu ríkisvaldsins og sjálfstæði dómstóla. Málinu var vísað frá Hæstarétti.

Að mati hans er nefndin aðeins umsagnaraðili um hvort rétt sé að fallast á endurupptökubeiðni. Þykir honum enn fremur ljóst að fallist nefndin ekki á slíka beiðni geti viðkomandi látið reyna á synjunina í almennu dómsmáli.

„Lagaákvæðum um endurupptökunefnd var á sínum tíma ætlað að taka þann kaleik frá dómstólum að þeir taki ákvörðun um hvort mál skuli endurupptekin. Sú viðleitni hefur farið út um þúfur og lagaákvæðin um nefndina eru því hreinn bastarður. Hér var því verr af stað farið en heima setið,“ ritar Ragnar.

Grein Ragnars í heild sinni má lesa með því að smella hér.