Elín Sigfúsdóttir afplánar í fangelsinu á Akureyri

Elín Sigfúsdóttir, fyrrverandi framkvæmdastjóri fyrirtækjasviðs Landsbankans, sem dæmd var í fangelsi vegna Ímon-málsins svokallað hefur hafið afplánun í fangelsinu á Akureyri.

Eftir því sem Vísir kemst næst hóf Elín afplánun um miðjan febrúar en í fangelsinu á Akureyri eru nú tíu fangar, sex konur og fjórir karlar.

Fangelsið á Akureyri er lokað fangelsið, eins og Litla-Hraun og Hegningarhúsið. Ekki er vitað hvers vegna Elín afplánar á Akureyri, en ekki til dæmis á Kvíabryggju sem er opið fangelsi, en samkvæmt heimildum Vísis hefði það komið til greina. Á Kvíabryggju afplána nokkrir aðrir fyrrverandi stjórnendur stóru bankanna fyrir hrun fangelsisdóma, þar á meðal Hreiðar Már Sigurðsson, Sigurður Einarsson og Birkir Kristinsson.

Elín var í október síðastliðnum dæmd í Hæstarétti í 18 mánaða fangelsi vegna Ímon-málsins en auk hennar voru þeir Sigurjón Þ. Árnason, fyrrverandi bankastjóri Landsbankans, og Steinþór Gunnarsson, fyrrverandi forstöðumaður verðbréfamiðlunar bankans, sakfelldir. Hlaut Sigurjón þriggja og hálfs árs langan dóm og Steinþór níu mánaða dóm.