Beckham: „Verð veikur þegar ég er í burtu frá börnunum mínum“

Englendingurinn David Beckham prýðir forsíðu GQ í apríl og er það í fyrsta skipti sem þessi enska goðsögn er framan á því blaði.

Beckham er einn allra þekktasti knattspyrnumaðurinn í heiminum, þrátt fyrir að hafa lagt skóna á hilluna, en hann er fertugur að aldri.

„Ég er mjög öruggur í mínu lífi og sérstaklega sem eiginmaður og faðir. Ég er kominn yfir það að hafa miklar áhyggjur af hlutunum,“ segir Beckham í viðtali við GQ.

Beckham segir að erfitt sé að ná stöðuleika á milli fjölskyldulífsins og að vera eins opinber persóna og hann er.

„Ég verð líkamlega veikur ef ég er lengi í burtu frá börnunum mínum.“

Hann segist sakna fótboltans á hverjum einasta degi.

„Ég veit ekki hvort það sé bara íþróttamaðurinn í mér, eða hvað ég elska leikinn mikið. Ég held alltaf að ég sé klár í slaginn og geti spilað.“