Fjármálaráðherra segir að girt hafi verið fyrir undanskot í skattaskjólum

Fjármálaráðherra segir að girt hafi verið fyrir að efnaðir Íslendingar feldu eignir sínar í útlöndum og slyppu þannig við skattheimtu, með upplýsingaskiptasamningum innan OECD samstarfsins. Hann hafi ekki vitað af eignum eiginkonu forsætisráðherra á Jómfrúaeyjum en ekkert benti til að lög hefðu verið brotin.

Árni Páll Árnason formaður Samfylkingarinnar spurði fjármálaráðherra í fyrirspurnatíma á Alþingi í dag hvað væri gert til að koma í veg fyrir að efnaðir Íslendingar komi tekjum í skattaskjól í öðrum löndum sem hafi verið viðvarandi fyrir hrun. Nú kæmu gjaldeyrishöft í veg fyrir þetta en þau yrðu brátt afnumin.

„Þessi staða veldur því að byrðarnar af velferðarþjónustunni leggjast allar á millistéttina og hinir ríkustu sleppa við að leggja af mörkum til hinnar sameiginlegu þjónustu eins og þeir ættu að gera,“ sagði Árni Páll.

Bjarni Benediktsson fjármálaráðherra sagðist hafa beitt sér fyrir aðild Íslands að alþjóðlegum samningum Efnahags og framfarastofnunarinnar um upplýsingaskipti skattyfirvalda sem hafi gefist vel. Flestir hefðu haft mestar áhyggjur af eignarhaldsfélögum á aflandssvæðum þar sem verið væri að fela eignir og þá kæmu upplýsingaskiptin sér vel.

„Þar sem eignir eru ekki tilgreindar í skattframtölum. Sömuleiðis viðskipti í slíkum félögum á lagskattasvæðum sem hvergi eru þegar upp er staðið skattlögð,“ sagði fjármálaráðherra.

Upplýst var í gær að Anna Sigurlaug Pálsdóttir eiginkona Sigmundar Davíðs Gunnlaugssonar forsætisráðherra ætti félag skráð á bresku Jómfrúareyjunum. Í svari við fyrirspurn frá Óttarri Proppé formanni Bjartrar framtíðar sagðist fjármálaráðherra ekki hafa vitað fyrr en í gær að eiginkona forsætisráðherra hafi verið ein af kröfuhöfunum í föllnu bankana.

„Finnst hæstvirtum fjármálaráðherra að forsætisráðherra hefði átt að láta þing og þjóð vita af því að kona hans væri erlendur kröfuhafi og þar með að fjölskylda hæstvirts forsætisráðherra ætti verulega hagsmuni undir því hvernig þingið afgreiddi þessi mál,“ spurði Óttarr.

Bjarni sagði best að forsætisráðherra svaraði sjálfur fyrir sín mál eins og hann væri viss um að hann myndi gera ef eftir því væri leitað.

„Ég hef ekki séð neitt annað fram komið í þessu máli en það að lögum og reglum hafi verið fylgt. Að því leytinu til er ég ekki í nokkurri stöðu til að segja að eitthvað óeðlilegt hafi verið hér á ferðinni,“ sagði Bjarni Benediktsson.