Allt morandi í hæfileikum í "Breiðholt Got Talent“

Hæfileikakeppnin „Breiðholt Got Talent“ fór fram fyrr í dag en hún var haldin á vegum Frístundamiðstöðvarinnar Miðbergs.

Alls voru 35 börn sem tóku þátt í tíu dans og/eða söngatriðum.

Í tilkynningu frá Miðbergi kemur fram að atriðin hafi verið hvert öðru betra og hafi dómnefndin ekki verið öfundsverð af því að þurfa að velja sigurvegara.

Öll atriðin fengu viðurkenningu og má þar til dæmis nefna „Frumlegasta atriðið“, „Bjartasta vonin“ og „Svalasta atriðið“.

Það var Rakel Ósk Ólafsdóttir, frístundaheimilinu Álfheimum, sem fór með sigur af hólmi í dag en hún var ein á sviðinu og söng lagið „Raddirnar“ eftir Gretu Salóme.