Japönsk menning í hávegum höfð

Þetta er í tólfta sinn sem hátíðin er haldin og hún er orðin mjög stór þáttur í félagslífi nemenda,“ segir Gunnella Þorgeirsdóttir, lektor og greinaformaður japönsku við Háskóla Íslands. Hátíðin er haldin í dag og hefst klukkan 13 og stendur til klukkan 17.

„Undirbúningur hefst í október og tekur yfir alveg janúar. Nemendur eru búnir að æfa dansatriði, tónlistaratriði og undirbúa mismunandi bása,“ segir Gunnella.

„Þetta er skemmtileg hátíð sem hristir saman nemendur og kennara. Tilgangurinn er að kynna námið og japanska menningu. Hátíðin er mjög vel sótt enda er japönskunámið með vinsælustu tungumálunum hér við háskólann.“

Kennsla í japönsku hófst við HÍ árið 2003 og var námið strax vel sótt. Árið á eftir var ákveðið að halda japönsku hátíðina sem hefur svo stækkað og sótt í sig veðrið á undanförnum árum. „Það varð strax mikill áhugi fyrir japanskri menningu. Það kom snemma upp sú hugmynd að hafa hátíð þar sem væri hægt að kynna námið en um leið japanska menningu almennt.“

Fjölbreytt dagskrá er í boði. „Það er til dæmis tískusýning þar sem við sýnum hefðbundinn japanskan klæðnað, eða kímonó. Það eru til margar tegundir af kímonó sem notaðar eru við mismunandi tilefni. Allir kennarar og nemendur eru svo í japönskum búningum auk þess sem verður Cosplay-keppni.“ Um er að ræða búningakeppni en mikil hefð er fyrir búningum í japanskri menningu.

„Þetta nær yfir hugmyndina um að klæða sig upp í búning byggðan á afþreyingarmenningu. Þetta upphófst allt í kringum vísindaskáldskap og afþreyingarmenningu en hefur breiðst út og það eru til margir mismunandi kimar núna.“ Hún segir Cosplay vera vinsælt hérlendis. Ýmsir hópar hittist til að mynda reglulega og klæði sig upp. Hægt verður að kynnast nokkrum þeirra á hátíðinni.