Geir Ólafs og Adriana eignast stúlku: „Ný Blue Eyes komin í heiminn!“

„Hún er með blá augu. Það er ný Blue Eyes komin í heiminn,“ segir söngvarinn Geir Ólafsson, en hann og kona hans Adriana eignuðust stúlku í morgun.

Geir segir í samtali við Vísi að stúlkan sé yndisleg og að lífið gæti ekki verið betra. „Þetta er magnaðasta tilfinning sem ég hef upplifað á ævinni.“

Hann segir aðdragandann að fæðingunni hafa verið nokkuð langan. „Adriana var eðlilega orðin nokkuð þreytt eftir að hafa verið með verki í einhverja þrjá daga. Svo gekk fæðingin svona ljómandi vel.“

Stúlkan kom í heiminn á kvennadeild Landspítalans í Reykjavík klukkan 6:32 í morgun. „Hún heillaði náttúrulega alla í stofunni og sérstaklega pabba sinn.“

Geir og Adriana Patricia Sanches Krieger, sem er menntaður markaðsfræðingur frá Kólumbíu, kynntust árið 2009 og trúlofuðust árið 2013.

Stúlkan er um tíu merkur og 50 sentimetrar.