Kolbeinn kom inn á sem varamaður og skoraði sigurmarkið

Kolbeinn Sigþórsson reyndist hetja Nantes gegn Saint-Etienne í frönsku úrvalsdeildinni í knattspyrnu, en hann skoraði sigurmark Nantes. Annað mark Kolbeins á tímabilinu.

Nolan Roux kom Saint-Etienne yfir af vítapunktinum á fjórtándu mínútu, en Johan Audel jafnaði metin fyrir Nantes eftir hálftíma leik. Staðan 1-1 í hálfleik.

Á 70. mínútu kom Kolbeinn inn á sem varamaður og sjö mínútum síðar var hann búinn að skora með góðu skoti. Lokatölur 2-1 og Kolbeinn hetjan.

Með sigrinum hoppaði Nantes upp í tíunda sæti deildarinnar, en þeir eru með 27 stig. Saint-Etienne er í sjöunda sætinu með 29 stig.

Kolbeinn var fyrir skömmu mikið gagnrýndur af þjálfara liðsins fyrir að vera ekki í nægilega góðu formi og því gefur það Kolbeini líklega mikið sjálfstraust að komast á blað. Annað mark Kolbeins í Frakklandi í fimmtán leikjum.