Framkvæmdir að hefjast við hótelbyggingu á Hörpureit

Samningum er lokið við jarðvinnuverktaka og fyrstu framkvæmdir að hefjast við byggingu glæsihótels Marriot EDITION á svokölluðum Hörpureit við höfnina í miðbæ Reykjavíkur.

„Þetta er bara að fara í gang,“ segir Tryggvi Jónsson, framkvæmdastjóri mannvirkja hjá verkfræðistofunni Mannviti, sem með T.ark-arkitektum sér um hönnun og stjórn framkvæmda á svæðinu.

Þegar hótelbyggingin var kynnt í apríl í fyrra var gert ráð fyrir að framkvæmdir myndu hefjast við bygginguna þegar síðasta haust, en þeim áætlunum var síðan frestað fram í janúar á þessu ári. Þrátt fyrir þá töf segir Tryggvi enn gert ráð fyrir því í áætlunum að nýtt hótel verði opnað á vordögum 2018. „En svo getur auðvitað ýmislegt komið upp á, en áætlanirnar gera ráð fyrir því.“

Bandaríska fasteignafélagið Carpenter & Company keypti byggingarréttinn fyrir hótelið á Austurbakka 2 við Reykjavíkurhöfn, en auk hótelsins er byggt upp íbúðarhúsnæði og verslanir á nærliggjandi lóð. Fram kemur á vef Mannvits að heildarfjárfesting verkefnisins sé áætluð um 14 milljarðar króna, en í heild verði rúmlega 250 herbergi í hótelinu, auk 90 íbúða og verslana í þeim fimm byggingum sem reistar verði næst hótelinu.

Gert er ráð fyrir því að framkvæmdin skapi ríflega 200 ný störf og að um 150 starfsmenn vinni á hótelinu sjálfu þegar það er komið í rekstur.

Hér fyrir neðan má sjá frétt Stöðvar 2 um málið frá því þegar greint var frá samningunum við Marriot í ágúst síðastliðnum.