Karl var mis­notaður af póst­burðar­manninum í æsku: „Ég bara gafst upp“

„Ég var orðinn ellefu ára gamall og það bjó póstburðarmaður í hverfinu mínu,“ segir Karl Ómar Guðbjörnsson, í átakanlegu viðtali í söfnunarþætti Stígamóta á Stöð 2 á föstudagskvöldið. Hann lýsti því að hafa orðið fyrir grófu kynferðisofbeldi aðeins ellefu ára gamall.

„Hann var rosalega vinsæll í hverfinu og við krakkarnir í hverfinu hjálpuðum honum að bera út blöðin og svona. Hann var alltaf hress og skemmtilegur, það vantaði ekki. Hann var síðan alltaf með helling af sælgæti sem hann gaf okkur fyrir að hjálpa sér.“

Karl segir að maðurinn hafi alltaf verið með splunkunýjan lakkrís á sér og það hafi krökkunum í hverfinu þótt spennandi.

Var ekki með neitt nammi á sér

„Eitt sinn þegar ég er aleinn að bera út með honum kemur í ljós að hann er ekki með neitt nammi á sér. Hann bauð mér því heim til sín, og það var þá sem þetta gerðist. Hann byrjaði að segja mér frá að hann væri sko að taka mig að sér, útaf því að mamma og pabbi væru að fara flytja til útlanda á morgun, og hann ætti að taka við mér. Eftir smá spjall fór hann að þukla á mér og spurði mig hvort að mamma og pabbi gerðu ekki svona við mig líka.“

Hann segir að maðurinn hafi talið honum trú um að foreldrar ættu að gera svona við börn til að fræða þau.

„Svo gekk hann alltaf lengra og lengra. Hann taldi mig trú um það að mamma og pabbi væru vondir foreldrar, af því að þau voru ekki búin að sýna mér þetta. Hann í rauninni misnotaði mig alla leið. Þetta var svo sárt. Ég man að ég stóð upp einhvern veginn með buxurnar á hælunum, og hann að hóta mér að ef ég myndi segja frá þessu myndi ég drukkna og mamma og pabbi líka.“

Karl sagði ekki frá atvikinu í mörg ár.

Sagði engum frá

„Ég næ að sparka í hann, á viðkvæma staðinn og það var á þeim tímapunkti sem ég náði að hlaupa út. Ég sagði aldrei neinum frá. Ég kom heim og ég man að það sem ég óttaðist mest væri hvort það væru ferðatöskur á gólfinu og hvort mamma og pabbi væru að fara.“

Hann segir að móðir hans hafi strax áttað sig á því að það væri eitthvað að þegar Karl kom heim.

„Ég sagði bara að strákarnir höfðu verið að stríða mér. Það sem gerist í kjölfarið þegar vikurnar og mánuðirnir liðu var að ég lokaðist. Ég tók aldrei þátt í neinu í skólanum og stóð alltaf bara út í horni og talaði aldrei við neinn. Ég var síðan lagður í gróft einelti. Ég bara gafst upp.“

Hér að neðan má sjá viðtalið við Karl í heild sinni. Alls söfnuðust 58.365.000 í sérstökum söfnunarþætti Stígamóta sem sýndur var í beinni útsendingu á Stöð 2 á föstudagskvöldið. Um er að ræða átak Stígamóta sem ber heitið Styttum svartnættið. Markmið átaksins er að efla og bæta þjónustu um land allt við brotaþola sem hafa orðið fyrir kynferðisofbeldi.

Hægt er að styrkja Stígamót með því að leggja inn á eftirfarandi reikning: Bankanúmer: 101-15-630999 Kt.: 620190-1449