Biðin rekur fólk á bráðadeild

Af þeim um 85.000 einstaklingum sem leituðu til bráðamóttöku Landspítala í Fossvogi hefðu allt að 13.000 þeirra í raun átt að leita til heilsugæslunnar til að leita úrlausnar vegna heilsuvanda síns. Komum á bráðamóttökuna fjölgar ár frá ári sem skýrist að hluta af fjölgun ferðamanna.

Bráðamóttakan er hugsuð fyrir þá sem þurfa að leita sér aðstoðar vegna bráðra veikinda eða slysa og geta ekki beðið úrlausnar heilsugæslu eða á læknavakt.

Guðlaug Rakel Guðjónsdóttir, framkvæmdastjóri flæðisviðs, segir að tvisvar á fimm ára tímabili hafi komur á bráðadeildina í Fossvogi verið greindar með tilliti til þessa og útkoman hafi verið sú sama í bæði skiptin. Verkferillinn er þannig að hjúkrunarfræðingur í móttöku forgangsraðar sjúklingum eftir því hversu slasaðir eða veikir þeir eru, um er að ræða fimm flokka kerfi. Margir sem flokkast í fjórða flokk, og allir í þeim fimmta, eru taldir geta beðið á meðan alvarlegri tilfellum er sinnt og í því ljósi fengið lausn sinna mála hjá heilsugæslunni.

Guðlaug Rakel telur að undirliggjandi ástæða þessa sé sú að það vanti skýran vegvísi um kerfið – hvert beri að leita í það og það skiptið. „Það sem fólk segir sjálft við komuna til okkar er að það fái ekki tíma í heilsugæslunni fyrr en eftir langan tíma, eða að aðgengið að þjónustunni henti ekki,“ segir Guðlaug Rakel en bætir við að unnið sé með heilsugæslunni við að vísa fólki af bráðamóttökunni þangað – og hefur gengið ágætlega. „Ef á að halda uppi vissu þjónustustigi, og það viljum við held ég öll, þá gengur ekki að biðtíminn hlaupi á nokkrum dögum. Ég held að meirihluti þessa hóps sem um ræðir komi til okkar vegna þessa. Kannski þarf breytingar á þjónustustiginu í heilsugæslunni til að laga þetta.“

Spurð um þýðingu þessa fyrir daglegan rekstur bráðadeildarinnar svarar Guðlaug Rakel því til að enginn megi halda að hann sé óvelkominn á bráðadeildina. Hins vegar taki þetta vissulega tíma starfsfólks, þó þessi hópur sjúklinga hafi yfirleitt stuttan meðferðartíma – þó upplifun fólks sé oft að biðtíminn sé langur. Það skýrist þó af eðli starfs deildarinnar að huga fyrst að þeim sem frekast þurfa á því að halda. Eins sé það eðlileg hugsun þegar veikindi knýja dyra að leita strax þangað sem líklegast sé að fá úrlausn sinna mála, og fyrir hvern og einn sé erfitt að meta hvort veikindi séu alvarleg eða ekki. 

Fréttin birtist fyrst í Fréttablaðinu