Brynjar Níelsson: Flokkurinn verður að standa saman í stóru málunum

Brynjar Níelsson, þingmaður Sjálfstæðisflokks, segist ósáttur við að samflokkskona hans, Unnur Brá Konráðsdóttir, hafi greitt atkvæði með tillögum stjórnarandstöðunnar um þingrof. Mikilvægt sé að flokkurinn standi saman í svo stórum málum.

„Ég hef oft sagt, innan þingflokksins líka, að ef menn ætla að ná árangri þarf liðsheildin að vera sterk, að menn standi saman,“ sagði Brynjar í Eyjunni á Stöð 2 í kvöld.

„Menn eru auðvitað ekkert sammála um allt og menn takast á. En ef það kemur niðurstaða innan þingflokksins í stórum pólitískum málum eins og hvort menn ætli að lifa áfram í ríkisstjórn eða ekki, fjárlagafrumvarpið og öðrum stefnumálum, þá þurfa menn að standa saman sem einn maður, annars kemur bara losarabragur á þetta og erfiðara verður að framkvæma hlutina.“

Aðspurður um stöðu flokksins í dag, í ljósi þess hversu mikið hefur gengið á að undanförnu, með vísan í afsögn Hönnu Birnu Kristjánsdóttur og mál Illuga Gunnarssonar og Orku Energy, sagði Brynjar að þessi mál hafi reynst flokknum óþægileg. Nú þurfi að líta í eigin barm og auka traust og trúverðugleika.

„Þessi mál hafa verið okkur óþægileg, það er alveg augljóst. En það sem við getum gert er að leggja þessi stóru hagsmunamál þjóðarinnar í dóm kjósenda. Við þurfum auðvitað að líta í eigin barm yfir þessum mistökum, sem við getum kallað PR klúður – minniháttar mál. Við þurfum að velta fyrir okkur hvort við höfum alltaf gert rétt, gagnrýna okkur sjálf og fara yfir þetta. Það eru sumir laskaðri en aðrir. Menn þurfa að auka traust og trúverðugleika,“ sagði Brynjar.

Þá var hann spurður hvort ekki hefði verið kjörið tækifæri að kynna inn nýjan ráðherra, líkt og Framsókn gerði, í ljósi þess hversu stutt væri í næstu kosningar. „Það gæti auðvitað verið ágætt að breyta einhverri ásýnd. En nýr ráðherra gerir ekkert á sex mánuðum. Það væri þá bara eitthvað fix sem ég held að skipti ekki neinu máli.“

Þáttinn í heild má sjá hér fyrir neðan.