Ísland í dag: Sagt að vera þakklát fyrir að einhver sé til í tuskið

„Mér hefur verið hótað nauðgun fyrir að segja nei út af því að ég á að vera svo þakklát því að það er eitthvað góðgerðarverkefni að fara heim með mér,“ segir Inga Björk Bjarnadóttir listfræðinemi.

Í Íslandi í dag var rætt við fimm einstaklinga um upplifun þeirra af tilhugalífi, stefnumótamenningu og fötlunarfordómum. Inga Björk segist hafa lent í því úti á lífinu í Reykjavík að menn sem sýni henni áhuga, sem hún hafnar, kalli hana tík og tussu og minni hana á að hún ætti nú bara að vera þakklát fyrir að einhver skuli vera til í tuskið.

Sjá má umfjöllunina sem birtist í Íslandi í dag í kvöld í spilaranum hér að ofan.

Einnig var rætt við Emblu Guðrúnu Ágústsdóttiu og Freyju Haraldsdóttur hjá Tabú.is. Segja þær þessir fordómar verði til þess að fatlaðir einstaklingar í samböndum lokist gjarna inni í þeim – því að samfélagið og jafnvel nákomnir telji viðkomandi trú um að það verði nú ekki mikið betra en þetta. Þetta geri fatlaða einstaklinga meðal annars útsettari fyrir því að lenda í ofbeldissamböndum.

Leifur Leifsson uppistandari segist stundum efast þegar hann dettur í sleik á djamminu og velta fyrir sér hvort hann sé einfaldlega að redda viðkomandi stigum í vinnustaðaratleiknum. Freyja Haralds rifjar upp að þegar jafnöldrur hennar eru spurðar út í strákamálin í fjölskylduboðum, er hún spurð hvernig gengur í skólanum.

Þar að auki var farið út í muninn á fordómunum sem þeir sem eru í sambandi með fötluðum karlmanni lenda í annars vegar og þeir sem eru með fötluðum kvenmanni lenda í hinsvegar.