Lögga hætti og rannsókn á vinnuslysi fjórtán ára barns dagaði uppi

Lögreglan í Vestmannaeyjum felldi í mars síðastliðnum niður mál á hendur fiskvinnslustöðinni Godthaab í Nöf í bænum sem gerst hafði uppvíst að brotum á vinnuverndarlöggjöfinni.

Fjórtán ára drengur var látinn vinna við hættulega vél, á tólf tíma vöktum og í næturvinnu en drengurinn lenti í vinnuslysi á vaktinni þar sem hann missti fingur og framan af öðrum fingri og hlaut varanlega örorku. Mál sem varða brot á vinnuverndarlöggjöfinni fyrnast á tveimur árum.

Slysið varð þann 24. júlí sumarið 2011 þegar drengurinn festi hægri hönd sína í marningsvél. Samstarfsmaður hans náði að stöðva vélina áður en verr fór. Var hann fluttur á sjúkrahúsið í Vestmannaeyjum og í framhaldinu til rannsókna á Landspítalann í Reykjavík.

Getur haft alvarlegar afleiðingar

Halldór Grönvold, aðstoðarframkvæmdastjóri ASÍ, segir grafalvarlegt að svona mál dagi uppi. Hann þekki ekki hvernig mál þessa drengs fór nákvæmlega en þetta geti haft varanlegan vanda í för með sér fyrir drenginn þegar kemur að honum að sækja sinn bótarétt vegna slyssins.

„Hin hliðin er svo auðvitað að brotaaðilinn kemst upp með þetta án þess að þurfa að bera af því nokkurn skaða.“

Í harðrorði tilkynningu frá Alþýðusambandi Íslands segir að brot á vinnuverndarlöggjöfinni virðast hafa lítið vægi hjá lögregluembættum landsins, jafnvel þó um vítaverð brot gegn barni sé að ræða eins og í þessu tilfelli.

Fiskvinnslufyrirtækið hafi brotið gegn lögum um aðbúnað, hollustuhætti og öryggi á vinnustöðum og reglugerð um vinnu barna og unglinga.

Einar Bjarnason, skrifstofustjóri hjá Godhaab í Nöf, segir málið hafa verið leyst þannig hjá fyrirtækinu að tryggingafélag þeirra hafi tekið við því.

Drengurinn sé enn að störfum hjá fiskvinnslunni.

„Þetta var bara leyst eins farsællega og hægt var, að því er við best vitum. Þetta var hörmulegur atburður og fékk á mjög marga.“

Löggan hætti og rannsókn dagaði uppi

Slysið var rannsakað fram til ársins 2012 þegar starfsmaðurinn sem sá um málið hjá lögreglunni í Vestmannaeyjum hætti störfum. Þar með stöðvaðist framgangur málsins að því er fram kemur í tilkynningu ASÍ.

„Þar sem refsingar vegna brota á vinnuverndarlöggjöfinni varða eingöngu sektum þá fyrnast slík mál á aðeins tveimur árum. Af þessum sökum felldi lögreglustjórinn í Vestmannaeyjum málið niður með bréfi dagsettu 9. mars 2016. Eftir situr einstaklingur sem varð fyrir vinnuslysi þar sem hann starfaði við aðstæður sem voru vítaverðar þegar barn á í hlut.“

ASÍ segir þetta mál alls ekkert einsdæmi. Kærur Vinnueftirlits ríkisins lendi gjarnan neðarlega á forangslista lögreglu, m.a. vegna þess hversu vægar refsingarnar eru.

„Til að koma í veg fyrir að þetta gerist þarf því að herða refsirammann og kveða á um að brot á vinnuverndarlöggjöfinni varði a.m.k. sektum eða 2 ára fangelsisvist, en við það lengist fyrningarfrestur slíkra mála í 5 ár.“

Fréttin var uppfærð klukkan 14:47 með viðtali við skrifstofustjóra Godthaab í Nöf.