Neytendastofa innkallar og bannar sölu á barnarúmum vegna hengingarhættu

Neytendastofa hefur ákveðið að setja á sölubann og innkalla Basson Baby-barnarúm af gerðinni Julia frá versluninni Ólavíu og Oliver þar sem það reyndist vera hættulegt börnum. Hætturnar fólust meðal annars í því af af rúminu gat stafað hengingarhætta vegna þess hvernig horn þess væru hönnuð.

Á vef Neytendastofu kemur fram að verslunin hafi áður innkallað rúmið vegna hönnunargallanna. Auk hengingarhættunnar voru hliðar rúmsins með gölluðum læsingum sem virkuðu ekki ávallt auk þess sem ekki var hægt að festa þær í neðri stöðu.  

„Þá var braut sem notuð var til að færa hliðina upp og niður þannig hönnuð að barn gat notað hana sem fótfestu og klifrað upp úr rúminu auk þess sem hætta var á að börn gætu klemmt sig. Verslunin ætlaði að láta lagfæra rúmin svo að þau væru í lagi. Neytendur voru hvattir til að hætta strax notkun barnarúmanna og hafa samband við Ólavíu og Oliver sem höfðu selt rúmin frá árinu 2008,“ segir á vef Neytendastofu.

Þá kemur jafnframt fram að verslunin hafi ekki getað veitt Neytendastofu fullnægjandi upplýsingar um það hvernig staðið var að lagfæringu á þeim rúmum sem höfðu verið seld eða sýnt fram á það með prófunarskýrslu að rúmin væru örugg eftir lagfæringu.

Því taldi Neytendastofa óhjákvæmilegt að leggja formlegt bann við sölu og afhendingu á vörunni og gera Ólavíu og Oliver að afturkalla hana frá neytendum og endurgreiða þeim kaupverðið.