Hamsturinn Gutti býr í dúkkuhúsi

Úlfrún Kristínudóttir er handlaginn þúsundþjalasmiður en hún breytti gamla dúkkuhúsinu sínu í einbýlishús fyrir hamsturinn Gutta. Hvert herbergi er málað í fallegum litum og göng og stigar liggja milli hæða.



„Mamma gaf mér eiginlega hugmyndina þegar við vorum að taka til í herberginu mínu og vorum að spá hvað við ættum að gera við gamla dúkkuhúsið því ég er hætt að leika mér með það. Ég breytti því í hamstrabúr fyrir loðhamsturinn minn Gutta,“ segir Úlfrún Kristínudóttir, tíu ára þúsundþjalasmiður.

„Ég hef gaman af því að smíða og hef smíðað ýmislegt í skólanum eins og bangsarúm, ávaxtakörfu og fleira. Skemmtilegast þykir mér að föndra, teikna og syngja, en ég er í kór,“ bætir hún við og segir lítið mál hafa verið að útfæra fyrirtaks hamstrabúr úr dúkkuhúsinu.

„Ég þurfti aðallega að loka fyrir öll göt og op á húsinu og gera hlera til þess að geta opnað og lokað búrinu. Ég þarf að geta opnað það á öllum hliðum svo ég geti þrifið búrið, gefið hamstrinum að éta og hleypt honum út.“

Úlfrún fékk örlitla hjálp frá pabba sínum og ömmu við smíðarnar en sá alfarið um að mála vistarverurnar að innan í fallegum litum. Gutti kemst milli hæða og herbergja í húsinu og segir Úlfrún hann hæstánægðan með nýja heimilið.

„Við gerðum gat í gólfið á efri hæðinni og svo setti ég spýtu með litlum þrepum á sem hamsturinn fer upp og niður á milli hæða. Uppáhaldsstaðurinn hans er kósíhorn þar sem hann hefur hreiðrað um sig í, dimmasta horninu á neðri hæð hússins, undir stiganum. Ég setti skrautlegan trékassa sem ég smíðaði og málaði í skólanum í búrið og göng sem ég gerði handa honum úr pappakassa. Ég hef átt Gutta í næstum því ár. Ég á hann alveg ein og sé um hann sjálf. Ég hef áður átt naggrísi með fjölskyldunni og við eigum hund sem heitir Skella. Hún er mjög forvitin um Gutta. Ég held að hún haldi að Gutti sé litli bróðir hennar,“ segir Úlfrún brosandi.

Kann Gutti einhverjar listir? „Gutti kann engin trix, en hann er mjög sterkur og á ekki erfitt með að klifra og hífa sig upp útitröppurnar heima hjá okkur. Gutta finnst flest grænmeti gott, en best þykir honum hrökkbrauð og alls konar poppkex,“ segir Úlfrún og auðséð er að henni þykir afar vænt um gæludýrið sitt. Á jólunum ætlar hún að gera sérstaklega vel við hann.

„Ég ætla ég að gefa Gutta maískex á jólunum.“