Gus Gus á toppi Esjunnar, en kjósið fyrst!

„Tónleikarnir eru haldnir uppi í Esjunni, en ekki alveg uppi á toppi, heldur við Steininn svokallaða. Þannig að maður þarf ekki að klífa síðustu hamrana og getur tekið með sér þokkalega stálpuð börn án þess að það verði vesen,“ segir Birgir Þórarinsson, betur þekktur sem Biggi Veira, léttur í bragði.

Biggi er einn af meðlimum hljómsveitarinnar Gus Gus sem heldur tónleika við Steininn á Esjunni, ásamt DJ Margeiri, í dag, laugardag, klukkan tvö.

Biggi Veira hvetur fólk til að vera búið að kjósa áður en það leggur leið sína upp á Esju. „Þetta verður æðislegur dagur, fólk getur kosið og gengið svo upp Esjuna í rólegheitum. Þetta tekur svona kannski einn og hálfan tíma fyrir óreynda göngumenn, án þess að æla úr sér lifur og lungum, en hálftíma fyrir þá sem eru í því að hlaupa upp,“ segir Biggi og hlær.

Gus Gus ætlar að frumflytja lag á tónleikunum.

„Já, allavega eitt nýtt lag. Við erum svona á milli platna. Erum búnir að vera að túra með Mexico, nýjustu plötuna og hún er eiginlega skemmtilegust að taka ,,live“ – þannig að þetta verður mjög þétt sett, eins og maður segir.“

En má búast við lögum af gömlu plötunum?

„Það má vel vera.“

Nú þegar hafa nokkur þúsund manns staðfest komu sína á fjallið á Facebook. Einhverjir ætla að nýta sér þann kost að taka þyrlu upp að Steini, en þyrluþjónusta verður við Esjurætur og selur ferðir upp fjallið.