BBC fjallar um gagnrýni Austfirðinga á veðurfréttirnar

Það vakti þó nokkra athygli í gær þegar Vísir greindi frá gremju Austfirðinga í garð veðurfréttamanna RÚV en Eiður Ragnarsson frá Djúpavogi deildi mynd af veðurfræðingi úr sjónvarpinu þar sem hann stendur fyrir Austfjörðum svo ekki sést spáin þar.

Sagði Eiður að það gengi á „með jakkafötum og hvítri skyrtu austanlands næstu daga,“ en fjörugar umræður sköpuðust við færsluna og stigu fjölmargir og sögðust hafa kvartað yfir staðsetningu veðurfræðinga á skjánum í gegnum tíðina.

RÚV sendi Austfirðingum svar á Facebook í gær, sem sjá má hér að neðan, en í dag fjallar Breska ríkisútvarpið, BBC, um þessa gagnrýni Austfirðinga á veðurfréttirnar.

Vísa þeir í frétt Iceland Monitor um málið og í umræðurnar sem sköpuðust um málið á Facebook. Þá greinir BBC jafnframt frá því að í gærkvöldi hafi veðurfréttamaðurinn staðið á öðrum stað og ekki skyggnt þannig á Austfirði en í fréttinni kemur fram að Austfirðingar séu ekki þeir einu sem kvartað hafa yfir staðsetningu veðurfréttamanna í gegnu tíðina.

Þannig hafi BBC breytt veðurkorti sínu árið 2005 eftir að kvartanir bárust um það að Skotland og norðurhluti Englands litu út fyrir að vera minni en þau eru í rau og veru á kortinu.