Kornabarn var laust í leigðum barnabílstól

„Ég tel ekki treystandi að leigja bílstóla frá versluninni Ólavíu og Ólíver eftir mína reynslu,“ segir Guðbjörg Hulda Karlsdóttir en hún leigði barnabílstól af versluninni á dögunum sem var að hennar sögn gallaður.

Eftir að hafa haft stólinn á leigu í rúmlega viku tekur Guðbjörg eftir því að ólarnar sem halda barninu í stólnum höfðu verið vitlaust þræddar í stólinn þegar hún tók við honum. Engar reglur gilda um leigu á bílstólum.

„Við höfum reglur um það hvernig við yfirförum stólana, það er í raun bara ein manneskja hér sem sér um það,“ segir Birna Hrund Árnadóttir, eigandi Ólavíu og Ólívers. Hún kannast ekki við umrætt mál en segir það koma sér á óvart.

Starfsmaður verslunarinnar fór yfir stólinn að Guðbjörgu viðstaddri þegar hún skilaði honum og varð ekki var við það að ólarnar væru rangt festar fyrr en Guðbjörg benti á gallann. 

„Ég bið hana um að fara yfir stólinn fyrir framan mig, í raun til þess að sjá hvort hún átti sig á því hvað er að honum. Þær fara tvær yfir stólinn og hvorug þeirra tekur eftir því að ólin var laflaus,“ segir Guðbjörg.

„Mér vitanlega eru litlar sem engar reglur um svona leigu, staðan er þannig að það er gat í löggjöf með svona viðskipti,“ segir Tryggvi Axelsson, forstjóri Neytendastofu. Að hans mati myndi það styrkja stöðu neytenda ef settar væru reglur um útleigu á lausafjármunum.

Herdís Storgaard, verkefnastjóri Miðstöðvar slysavarna barna, gagnrýnir það að engar reglur gildi um leigu af þessu tagi. „Ég hef í mörg ár reynt að fá stjórnvöld til að setja reglur um það hvernig leigu á svona öryggisvörum skuli háttað,“ segir Herdís.

Herdís segir að í Svíþjóð hafi sænska umferðarráðið gert þá kröfu að þeir aðilar sem selja eða leigja öryggisbúnað fyrir börn í bílum sitji reglulega námskeið. 

„Þegar stóll sem kemur inn úr leigu er skoðaður þá þarf sá aðili að hafa til þess þekkingu og vissa þjálfun, það nægir ekki að sjónskoða stólana.“

VÍS leigir einnig út barnabílstóla en Arnþór Þórðarson, umsjónarmaður barnabílstóla hjá VÍS, segir að farið sé yfir alla stóla hjá þeim og þeir þrifnir. 

„Þegar stólarnir koma inn til okkar þá tökum við af þeim áklæðið og þeir eru skoðaðir. Ólarnar, læsingarnar og allur búnaður er prófaður.“ 

Fréttin birtist fyrst í Fréttablaðinu 28. júní 2016