Karlar þurfa að taka þátt svo að konur séu metnar til jafns

Í dag er ár frá því að Emma Watson, velgjörðarsendiherra UN Women, kynnti átakið HeForShe fyrir heiminum. Einn af hverjum tuttugu karlmönnum á Íslandi skráðu sig í átakið á aðeins örfáum dögum og aðeins í Bretlandi skráðu fleiri karlmenn sig sem HeForShe. Þess má geta að UN Women á Íslandi var veitt viðurkenning fyrir þann árangur síðastliðið vor.

Í tilefni ársafmælis HeForShe efnir UN Women á Íslandi til átaks og hvetur alla karlmenn og stráka hér á landi til að stíga skrefið og skrá sig. Tilgangur átaksins er að fá karla og stráka til þess að taka virkan þátt í baráttunni fyrir kynjajafnrétti. Í dag eru Svíar komnir upp í 9.000 en markmið UN Women á Íslandi er að komast upp í 10.000 á næstu tveimur vikum.

„Við getum leyft Svíum að vinna Eurovision en við hér á Íslandi skulum taka HeForShe,“ segir Marta Goðadóttir, herferðarstýra UN Women á Íslandi, sem hvetur karlmenn og stráka til að gerast Heforshe á www.heforshe.is

Markmið HeForShe er að stuðla að hugarfarsbreytingu. Mikilvægt er að karlmenn og strákar taki þátt í að breyta úreltum staðalímyndum um hlutverk kynjanna til dæmis innan veggja heimilisins og við uppeldi barna sinna. Það er ekki síður mikilvægt að karlmenn séu meðvitaðir um fjarsamfélag sitt þar sem mannréttindabrot eiga sér stað á hverjum degi.

Friðrik Dór var einn af þeim fyrstu til að skrá sig í HeForShe hér á landi. 



„Átakið hefur heilt yfir aðeins dottið niður þannig það er algjörlega kominn tími til að rifja þetta aðeins upp aftur og koma skráðum meðlimum upp í 10.000 manns. Það er mikilvægt að fá unga drengi með og að þetta verði orðið stimplað inn hjá þeim og í rauninni búa til ný norm. Þessi gömlu norm eru svo brengluð og skrítin en því er hægt að breyta með orðræðu og öllu sem því fylgir. Mér finnst 1.500 manns ekki hljóma eins og ósigrandi tala, sérstaklega ef þeir sem eru skráðir eru duglegir að dreifa boðskapnum.“

Helgi Hrafn Gunnarsson segir að menningarleg bárátta sé mun víðtækari en sú pólitíska. 



„Það er mikilvægt að skrá sig í HeForShe vegna þess að þótt lagalegu jafnrétti hafi næstum öllu verið náð með fáeinum lausum endum þá er menningarleg barátta mun víðtækari en sú pólitíska. Þörfin fyrir viðhorfsbreytingar er mikil og það er mikilvægt að karlar taki þátt í því til þess að konur séu metnar til jafns við karlmenn, ekki bara með lagasetningum heldur einnig í samfélaginu.“

Bragi Valdimar segir að þörfin fyrir sterkum kvenröddum sé enn mikil. 



„Við eigum að standa saman öll, alltaf. Einn fyrir alla og allir fyrir eina. Ég ætla rétt að vona að það náist að safna upp í 10.000 skráða meðlimi annars fer ég heim til manna. Það er orðið tímabært að ýta aftur við þessu enda á þetta átak alltaf að vera í gangi. Þetta er táknrænt og mikilvægt að ná í almennilegan massa, þá verður þetta að einhverju. Jafnréttisbaráttan hér á landi er í góðum gangi og það er mikið af sterkum kvenröddum að stíga fram en við viljum meira.“

Þú getur látið til þín taka í jafnréttisbaráttunni með því að: 

• Hvetja aðra karlmenn og stráka til að beita sér markvisst í baráttunni fyrir jöfnum hlut karla og kvenna á öllum vígstöðvum
• Láta í þér heyra þegar þú verður var/vör við óréttlæti í garð kvenna og stúlkna á vinnustöðum, í skólum, á almenningsstöðum eða á Netinu
• Stuðla að hugarfarsbreytingu með því að útrýma niðurlægjandi orðræðu um konur
• Taka þátt í að breyta úreltum staðalímyndum um kynjahlutverk til dæmis innan veggja heimilisins og við uppeldi barna þinn
• Mana næsta karlmann til að gerast heforshe á www.heforshe.is