Ólöf Einarsdóttir, móðir Eiðs Smára Guðjohnsen, var í viðtali í Bítinu á Bylgjunni í morgun þar sem hún sagðist eiga von á því að allir þrír synir hans yrðu atvinnumenn í knattspyrnu.
„Ég hef alltaf sagt að þó svo að þeir séu ungir þá hefur maður séð þegar þeir æfa og spila - ef allt gengur að óskum - að þeir verða allir atvinnumenn,“ sagði Ólöf en viðtalið má heyra í heild sinni hér fyrir ofan.
Hún sagði að Sveinn Aron, 17 ára, sé nýkominn aftur frá Hollandi þar sem hann var á reynslu hjá Groningen. „Mér skilst að það sé samningur sem sé verið að skoða nú,“ sagði hún.
Þá sé Andri Lucas, 14 ára, að semja við Espanyol og, eins og kom fram í gær, þá er hinn níu ára Daníel Tristan búinn að skrifa undir hjá Barcelona.
„Það er svakaleg harka í þessum strákum. Þeir eru mjög efnilegir og gaman að fylgjast með þeim. Þetta er auðvitað ekki eiginleg atvinnumennska en það er afar vel hugsað um þá.“
Ólöf var spurð hvort strákanir væru svipaðir knattspyrnumenn og faðir þeirra, Eiður Smári, eða jafnvel Arnór, afi þeirra. „Það er blanda af feðgunum, Arnóri og Eiði, í þeim öllum. En mér finnst þeir allir sérstaklegas fljótir og sá í miðjunni spýtist bara áfram. Þá er sá elsti stór og sterkur - orðinn stærri en pabbi sinn.“
„En þeir verða ekki allir sóknarmenn. Sá yngsti er búinn að skora mikið en hinir eru öflugir miðjumenn og sterkir í sendingum.“
Bræðurnir eignuðust litla systur á dögunum sem hefur fengið nafnið Ólöf Talía. „Það er aldrei að vita nema að hún muni styrkja íslenska kvennalandsliðið í framtíðinni,“ sagði amman stolt um nöfnu sína.
Fótbolti
