Öll flottustu fötin á einni vefsíðu

Frænkurnar Heiðdís Lóa Óskarsdóttir og Guðbjörg Sandra Guðjónsdóttir hafa sett á laggirnar nýja vefsíðu sem heitir Sstylista.is. Síðan býður þeim sem hafa áhuga á tísku upp á að sjá hvað er í boði í íslenskum verslunum. Þær eru í nánu samstarfi við nokkrar verslanir í Reykjavík og ætla á næstu vikum að auka úrvalið. Vefsíðan hefur fengið góð viðbrögð enda mörgu ábótavant hvað netverslun varðar á Íslandi.



„Ég var að leita að sumargjöf handa kærastanum mínum kvöldið fyrir sumardaginn fyrsta á netinu. Ég fór inn á endalaust margar síður og fann hvergi neitt. Það er erfitt að vita hvernig fötin eru þegar þau eru ekki á fólki. Þá fór ég að hugsa að það vantaði eina síðu þar sem hægt væri að sjá allt það helsta í búðum Reykjavíkur,“ segir Heiðdís Lóa.

Vefsíðan er ekki verslun en hún er meira eins og tískublogg þar sem birtast myndir af fyrirsætum í nýjustu fötum sem boðið er upp á. Þær gera allt sjálfar fyrir utan að sitja fyrir. „Mér datt ekki í hug að þetta yrði svona mikil vinna. Við finnum fyrirsætur, finnum fötin, förðum, tökum myndirnar, vinnum myndirnar, skilum fötunum. Þetta er samt mjög gaman og við erum að njóta þess að vinna í þessu.“

Á meðan stelpurnar eru að byrja og eru að koma sér á gott ról þá eru þær að gera þetta frítt en ef vefsíðan heldur áfram að stækka þá gætu þær hugsað sér að byrja að rukka fyrir myndir eða birta auglýsingar á síðunni. „Markmiðið var alltaf að fá búðirnar með okkur í þetta og þess vegna er mikilvægt að hafa síðuna virka og deila einhverju á hverjum degi. Við vonum að búðirnar séu ánægðar með þetta en það er mikill heimsóknarfjöldi á síðunni og því góð auglýsing fyrir þær. Viðtökurnar hafa verið rosalega góðar.“

Heiðdís Lóa hélt áður uppi sínu eigin persónulega bloggi sem náði miklum vinsældum og hún hefur því góða reynslu. „Ég var stundum með færslur sem hétu Fataskápurinn þar sem ég heimsótti stelpur og þær voru myndaðar í sínum eigin fötum. Þessar færslur voru alltaf mjög vinsælar og stylista.is er í raun svipuð pæling nema með búðir.“

Stelpurnar gera allt sjálfar, þar á meðal að taka myndirnar og vinna þær, hanna vefsíðuna og búa til vörumerki. Þær eru báðar í skóla og ætla að reyna að vera jafn duglegar eftir að hann byrjar aftur í haust. „Við eigum helling af myndum í geymslu sem við eigum eftir að vinna og birta. Annars þyrftum við að fara að taka myndir á hverjum degi. Hingað til höfum við verið að taka myndir einu sinni í viku,“ segir Heiðdís.