Ætla að koma öllum í gott skap

„Við frumflytjum verkið What the Heck? sem Jóhann G. Jóhannsson samdi fyrir okkur Dísurnar og Steef van Oosterhout slagverksleikara. Það er glænýtt og bráðskemmtilegt og kinkar kolli í átt að barokki, djassi og blúsi og danstöktum.“

Þannig byrjar Eydís Franzdóttir óbóleikari að lýsa efni tónleika sem kvartettinn Dísurnar heldur í Norræna húsinu á sunnudag klukkan 15.15.

„Þau Herdís Anna Jónsdóttir og Steef flytja líka verkið Fimm lög frá Gautlöndum sem Snorri Sigfús Birgisson vann upp úr gömlum þjóðlögum sem afasystir Herdísar Önnu söng á sínum tíma inn á band.

Svo verður leikinn litríkur kvartett eftir finnska tónskáldið Rautavaara og kvikmyndatónlist Nino Rota sem Jóhann G. setti saman í eina syrpu og hefur slegið í gegn hvar sem við höfum spilað hana. Það er músík sem fólk þekkir og kemur öllum í gott skap.“