Meadows ekki með í úrslitahlaupinu | Hagur Anítu vænkast

Jenny Meadows frá Bretlandi, sem átti að keppa til úrslita í 800 metra hlaupi á EM innanhúss í frjálsum íþróttum í Prag, hefur dregið sig úr keppni vegna veikinda.

Meadows hefur verið veik alla vikuna og ástand hennar versnaði mjög í nótt.

„Ég er vonsvikin yfir því að geta ekki hlaupið. Þegar ég fór að sofa var ég þess fullviss að ég gæti keppt,“ sagði hin 33 ára gamla Meadows.

Meadows lenti í 4. sæti í sínum riðli í undanúrslitunum en komst inn í úrslitin eftir að hin rússneska Anastasiya Bazdyreva var dæmd úr keppni fyrir að stíga út af hlaupabrautinni þegar hún tók fram úr Anítu Hinriksdóttur.

Það verða því aðeins fimm konur sem keppa til úrslita í 800 metra hlaupinu á eftir.

Hlaupið hefst klukkan 14:15.