Fjörutíu nemar koma að verkinu

Verkfræðinemar við Háskóla Íslands afhjúpuðu nýjan kappakstursbíl á Háskólatorgi í gær. Team Spark, eins og liðið kallast, fer með bílinn nýja í alþjóðlegu kappaksturs- og hönnunarkeppnina Formula Student á Silverstone-kappakstursbrautinni í Englandi í júlí.

„Rúmlega 40 nemendur í verkfræðideildum Háskóla Íslands hafa frá því í haust unnið að þróun og smíði kappakstursbílsins TS15, meðal annars í samstarfi við nemendur úr Listaháskóla Íslands,“ segir í tilkynningu skólans.

Liðið er sagt staðráðið í að fylgja eftir góðum árangri í keppninni í fyrra, en þá var Team Spark valið bestu nýliðarnir.