Verkfall tæknimanna RÚV dæmt ólöglegt

Boðað verkfall tæknimanna á RÚV sem hefjast átti klukkan 6 í fyrramálið hefur verið dæmt ólöglegt af Félagsdómi. Frá þessu er greint á vef RÚV.

Samningamenn Samtaka atvinnulífsins og Rafiðnaðarsambands Íslands sitja nú á fundi hjá Ríkissáttasemjara. SA fara með samningsumboð fyrir RÚV en Rafiðnaðarsambandið vill að SA geri sérstakan kjarasamning við tæknimennina. Því hefur SA hafnað.

Nýtt samningstilboð barst frá RÚV í dag varðandi það að hluti samningsins verði sérstaklega við RÚV. Rafiðnaðarsambandið fer yfir tilboðið í kvöld og á morgun en næsti fundur í deilunni er klukkan 10 á föstudag.

Hefði orðið af verkfallinu hefði það haft ýmsar afleiðingar. Til að mynda hefði ekki verið hægt að sýna landsleik Íslands og Kasakstan í beinni útsendingu á laugardaginn en nú er ljóst að hann verður sýndur.