Kraftakarlar kveinka sér undan Kastljósinu

Vísir greindi frá því í gær að margir þeirra sem eru í líkamsræktargeiranum hafi verið býsna ósáttir við umfjöllun Kastljóssins í vikunni; þá um fæðubótarefni en þar kom fram að þau væru heilbrigðum einstaklingum óþörf. Ívar Guðmundsson útvarpsmaður og vaxtarræktarmaður er ósáttur og segir þessa umfjöllun lýsa mikilli vanþekkingu. Og Egill Einarsson líkamsræktarfrömuður segir lyfjafræðinga með allt niðrum sig.

Viðtal Frosta og Mána við Egil í útvarpsþættinum Harmageddon vegna málsins er hér að neðan.

Og, þeim í Kastljósinu hafa borist kvartanir vegna málsins. „Það eru ekki margir sem hafa kvartað, en okkur hafa borist einhver bréf eins og oft gerist eftir umfjallanir miðla, það þekkja flestir blaðamenn,“ segir Sigmar Guðmundsson ritstjóri Kastljóssins. „En, þar sem við erum ágætlega nettengd hér á RÚV höfum við alveg sé að fólk hefur miklar skoðanir á þessu máli. Sem er bara gott.“

Margir sem hafa hagsmuni af fæðubótarefnum

Það fer sem sagt ekkert á milli mála að þetta umfjöllunarefni er viðkvæmt. Sigmar segir það koma á óvart, bæði og: „Það er kannski að hluta til vegna þess að það eru mjög margir sem nota þessi efni. Margir sem hafa hagsmuni af því sem flytja þau inn, og svo eru náttúrlega margir íþróttamenn sem eru með samninga og auglýsa þessi efni. Þannig að við skiljum það, og það er eðlilegt, að fólk hafi skoðanir á þessari umfjöllun. Fyrr mætti nú vera. En okkur finnst gæta svolítils misskilnings í gagnrýninni. Það kom hvergi fram í okkar umfjöllun að fólk þyrfti almennt aldrei á þessum efnum að halda. Það kom fram að venjulegt fólk, sem æfir ekki eins og afreksmenn, því fólki dugi að borða holla fæðu. En það kom líka skýrt frama að þeir sem æfa mjög mikið geta haft gagn af svona efnum. Það kom líka fram að það er ekkert eftirlit með þessu, eða sáralítið, og að umræða frá öðrum löndum sýnir það að í sumum tilfellum er um að ræða snákaolíu; rangar innhaldslýsingar.“

Sigmar sjálfur hefur notað prótein

Sigmar segir þannig að eftir á að hyggja ættu þessi miklu og hörðu viðbrögð ekki að þurfa að koma svo á óvart. „Eins og ég segi, fólk sem notar mikið af þessum efnum er kannski ekki tilbúið að kaupa þetta. En okkar umfjöllun byggir mikið til á áliti vísindamanna. Þetta er náttúrlega bara eitthvað sem heilbrigðisstarfsmenn, læknar og aðrir og starfsmenn lyfjastofnunar, hafa einfaldlega áhyggjur af því að neysla þessara efna sé alltof mikil.“

Og, Sigmar boðar áframhaldandi umfjöllun, í kvöld verður rætt við Ásdísi Hjálmsdóttur, ólympíufara og afreksmann, sem æfir bæði mjög mikið og er lyfjafræðingur. Hún hefur tvennskonar sjónarhorn á þetta.

En, hvernig er það með þig sjálfan, nú ert þú í góðu formi... hefur þú notað fæðubótarefni?

„Ég hef stundum, þegar ég æfi mikið, notað prótein. En það er bara þegar ég er í einhverjum ákafa, sem er alls ekki alltaf,“ segir Sigmar Guðmundsson.