Innipúkar hlaupa undir bagga með fórnarlömbum þjófnaðar

Aðstandendur og listamenn tónlistarhátíðarinnar Innipúkans hafa ákveðið að leggja Alexöndru Baldursdóttur, gítarleikara Mammút, og kærasta hennar lið. Þau urðu fyrir barðinu á þjófum sem brutust inn til þeirra og rændu af þeim hörðum diskum, tölvum og ýmsum raftækjum.

„Við vorum að ræða málin í kjölfar þessara ömurlegu fregna og í upphafi byrjaði þetta frekar smátt,“ segir Ásgeir Guðmundsson, annar skipuleggjenda hátíðarinnar. Í upphafi var ákveðið að þrjúhundruð krónur af hverju skoti af Fernet Branca myndi renna til parsins en í kjölfarið fór boltinn að rúlla.

Sjá einnig: Ógrynni af efni frá Mammút í þjófshöndum

„Þetta vatt upp á sig. Ég fékk símtal frá tónlistarmönnum sem spila á hátíðinni og þeir vildu láta fjórðung kaups síns renna til þeirra. Í kjölfarið heyrðum við í fleirum og það hafa allir tekið vel í þetta. Margir umboðsmannanna ætla einnig að gefa sín laun til þeirra,“ segir Ásgeir.

„Það er mjög þungbært að lenda í atviki sem þessu, bæði tilfinningalega og fjárhagslega. Það er erfiðara að bæta tilfinningalega tjónið en við ætlum að reyna að sjá til þess að fjárhagslega tjónið verði helst ekkert.“

Í gær var boðið upp á heljarinnar dagskrá á Húrra og Gauknum og seldust allir miðar upp. Jakob Frímann Magnússon og AmabAdamA stigu saman á stokk en einnig mátti berja Vaginaboys og Retro Stefson augum. Maus var með endurkomu og drengirnir í Úlfi Úlfi rifu svo þakið af Gauknum undir lok kvöldsins.

Í kvöld má sjá Sing Fang, Vök, Sturla Atlas og Gísla Pálma. Að auki kemur Steed Lord alla leið frá Los Angeles og Sudden Weather Change býður upp á endurkomu. Ásgeir býst við jafn góðri stemningu í kvöld og annað kvöld og var í gær.

„Þetta gekk framar vonum og það voru allir að skemmta sér svo fallega. Tónlistin er náttúrulega frábær og öll dagskrá hélt. Við búumst við því að kvöldið í kvöld verði eins,“ segir Ásgeir að lokum.

Þegar við vorum bókstaflega á fjórum fótum heima að taka til eftir kjarnorkusprenginguna sem óprúttnu aðilunum tókst að...

Posted by Alexandra Baldursdóttir on Friday, 31 July 2015