Árni Páll: Full ástæða til að hlusta eftir gagnrýni

Árni Páll Árnason sagði rétt eftir að úrslit voru ljós í formannskjöri Samfylkingarinnar að niðurstöður kosninganna væru sérkennilegar. Þær leggi þó á hann ríkar skyldur sem hann muni leitast við að axla eins vel og hann geti. Árni Páll bar sigur úr býtum með einu atkvæði gegn mótframbjóðanda sínum, Sigríði Ingibjörgu Ingadóttur.

„Ég vissi ekki við hverju var að búast því við höfum aldrei áður greitt atkvæði með þessum hætti. Þessi regla var sett í lok síðasta landsfundar,“ segir Árni Páll í samtali við Vísi.

„Ég mun hlusta eftir gagnrýni. Ég hef ekki heyrt nein efnisatriði sem menn leggja mér til lasts um eitthvað sem ég hefði getað gert betur en það er full ástæða fyrir mig til að hlusta eftir því,“ bætir hann við.

Sigríður Ingibjörg var sjálf undrandi en á sama tíma ánægð með meðbyrinn þegar Vísir náði af henni tali. „Ég held að flokkurinn hafi sýnt að hann er ekki dauður flokkur. Það er jákvætt fyrir okkur að sýna að þegar það er óánægja þá eru leiðir til að sýna það og hafa áhrif á breytingar,“ sagði hún.

Árni Páll fékk 241 atkvæði í kosningunum eða 49,49 prósent atkvæða. Sigríður Ingibjörg fékk hins vegar 240 atkvæði eða 49,28 prósent. Anna Pála Sverrisdóttir hlaut eitt atkvæði og gæti það atkvæði hafa ráðið úrslitum.