Metár í ofbeldi

Ofbeldisbrotum hefur fjölgað það sem af er ári 2015 miðað við fyrri ár og stefnir í metár í tilkynningum frá árinu 2007 á höfuðborgarsvæðinu. Fjölgun brota er rakin til aukningar í tilkynningum um heimilisofbeldi. Nýtt verklag tók gildi í byrjun árs 2015 um viðbrögð við heimilisofbeldismálum. Greining á verkefninu innan lögreglunnar hefur leitt í ljós að heimilisofbeldismálum fjölgaði ekki í sjálfu sér heldur hafi fleiri treyst sér til að tilkynna lögreglu um ofbeldið, sem í sumum tilvikum hafði staðið yfir í lengri tíma.

472 heimilisofbeldismál

Það sem af er ári hafa verið skráð 58% fleiri heimilisofbeldismál en bárust allt árið 2014, eða 472 mál. Þótt þessi mikla fjölgun í tilkynningum sé á þessu ári má sjá fjölgun heimilisofbeldisbrota í hruninu eða frá árinu 2010.

Það sem af er ári greinir lögregla lítillega aukningu í alvarlegum ofbeldisbrotum en nú þegar eru komnar 118 tilkynningar. Árið 2014 voru tilkynningarnar 151, sem er mesti fjöldi sem lögregla hefur séð á þessu tímabili.

Aldrei hafa borist eins margar tilkynningar um kynferðisbrot til lögreglunnar eins og á árinu 2013 þegar tilkynnt var um 408 brot. Í kjölfar umfjöllunar Kastljóss um kynferðisbrot fjölgaði tilkynningum. Það sem af er ári 2015 hafa 183 tilkynningar borist.

Þessi níu ár sem tölfræðin nær yfir (2007-2015) hafa að meðaltali um 40% ofbeldisbrota átt sér stað í miðborginni, en það sem af er ári hafa um 30% brota átt sér stað í miðborginni.

Síðastliðið sumar hrinti lögreglustjórinn á höfuðborgarsvæðinu af stað verkefni sem sneri að auknum sýnileika lögreglunnar í miðborginni, meðal annars með því að auka viðveru lögreglu aðfaranótt laugardags og sunnu dags. Markmiðið var meðal annars að reyna að auka öryggi almennings og lögreglumanna við störf í miðborginni. Í mati á verkefninu kemur fram að vegna átaksins séu lögreglumenn fljótari til að sinna útköllum í miðborginni. Meðal annars með því að koma inn í slagsmál áður en upp úr sýður og einnig að komast fyrr á vettvang og ná tali af öllum málsaðilum.

Ofbeldi og opnunartími

Þau svæði þar sem flest ofbeldisbrot eiga sér stað eru helst í kringum þá skemmtistaði sem opnir eru hvað lengst og hafa leyfi fyrir flestum gestum. Eins á stöðum þar sem fólk safnast saman að næturlagi um helgar eftir að skemmtunum lýkur. Lögreglan nefnir sem dæmi Austurstræti, þar sem margir staðir hafa lengri opnunartíma en ofar á Laugaveginum og Lækjartorg í kringum veitingasölu og bið eftir leigubílum.

Rannsóknir erlendis hafa sýnt fram á að lengri opnunartími skemmtistaða fjölgar ofbeldisbrotum og að styttri opnunartími og minna aðgengi að áfengi fækkar ofbeldisbrotum. Rannsókn í 18 borgum í Noregi sýndi til að mynda fram á að fyrir hvern klukkutíma sem opnunartími var lengdur fjölgaði líkamsárásum um 4,8 miðað við 100.000 íbúa. (Rossow og Nor­ström, 2012). Þessi þróun hefur líka orðið hér á landi.