Borgaði fyrir vörur í fatabúð í Kringlunni fyrir konu sem hafði hætt við eftir að kortinu var hafnað

„Þetta gladdi mig ekkert smá,“ segir Kara Kristel Ágústsdóttir um góðverk sem hún varð vitni að í verslunarmiðstöðinni Kringlunni í gær. Þúsundir manna leggja leið sína í Kringluna fyrir jólin og því mikil umferð þar á þessum árstíma. Töluvert stress getur einkennt þessar ferðir í mannmergðinni en Kara segir nokkra gesti Kringlunnar þó ekki hafa gleymt jólaandanum í mestu ösinni.

Kara vinnur sjálf í Kringlunni en hún deildi þessari frásögn á fjölmennustu Facebook-grúppu landsins, Góða systir.

„Þetta gerðist eiginlega allt á sama klukkutíma,“ segir Kara sem var á ferðinni síðdegis í gær.

Fyrst sá hún gamla konu missa gleraugun sín nærri veitingastaðnum Joe and the Juice og átti hún í vandræðum með að finna þau. Lítill ókunnugur strákur, um tíu ára aldur, kemur auga á gleraugun og réttir konunni þau. „Hún þakkaði mömmu hans fyrir að eiga svona yndislegan dreng og gaf honum 1000 krónur,“ segir Kara.

Annað góðverkið sem Kara varð vitni að átti sér stað þegar hún gekk framhjá fataversluninni Next. Þar kom maður hlaupandi út með poka og rétti konunni hann, en konan hafði lent í því að kortinu hennar hafði verið hafnað inni í búðinni og gat hún því ekki greitt fyrir vörurnar. „Hún hafði hætt við og hann borgaði það sem hún ætlaði að kaupa og gaf henni. Hún táraðist af þakklæti,“ segir Kara.

Söngkonan Þórunn Antonía stofnaði til Facebook-grúppunnar Góða systir en hópnum er ætlað að hvetja til vitundarvakningar um það hvernig konur tali um aðrar konur. Kara varð einmitt vitni að fallegu augnabliki á milli tveggja kvenna í Kringlunni í gær.

„Þær voru að tala saman um vinkonu sína og hversu yndisleg og frábær hún væri og hvað hún ætti skilið fallega jólagjöf frá þeim,“ segir Kara.